ម៉ូតូ២គ្រឿងបុគ្នាស្លាប់ម្នាក់ របួសធ្ងន់ស្រាល៣នាក់

ខេត្តកំពង់ឆ្នាំង ៖ មនុស្សម្នាក់បានស្លាប់ភ្លាមៗនៅកន្លែងកើតហេតុ និង៣នាក់បានរងរបួសធ្ងន់ និងស្រាល នៅក្នុងឧប្បត្តិហេតុគ្រោះថ្នាក់ចរាចរណ៍មួយ ដែលបង្កឡើងដោយម៉ូតូចំនួន២បានបើកបុកគ្នាពេញមួយទំហឹង កាលពីវេលាម៉ោងជិត៥ល្ងាច ថ្ងៃព្រហស្បតិ៍ ៤រោច ខែមិគសិរ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៧ ខែធ្នូ ឆ្នាំ២០១៧ នៅលើផ្លូវក្រាលកៅស៊ូ លេខ១៤៤ចំណុចសាលារៀនបឋមសិក្សាព្រះទ្វា ស្ថិតក្នុងភូមិត្រពាំងធំ ឃុំពង្រ ស្រុករលាប្អៀរ ខេត្តកំពង់ឆ្នាំង ។

សមត្ថកិច្ចបានឲ្យដឹងថា ជនរងគ្រោះក្នុងឧប្បត្តិហេតុគ្រោះថ្នាក់ចរាចរណ៍នេះ ១.ឈ្មោះម៉ៅ ប៊ន ភេទប្រុស អាយុ៤៨ឆ្នាំ រស់នៅភូមិស្អង ឃុំប្រស្និប ស្រុករលាប្អៀរ ជាអ្នកបើកបរស្លាប់នៅកន្លែងកើតហេតុ ។ ២.ឈ្មោះយិន គន្ធា ភេទប្រុស អយុ១៦ឆ្នាំ រស់នៅភូមិក្រាំងលាវ ឃុំក្រាំងលាវ ស្រុករលាប្អៀរ របួសធ្ងន់។ ៣.ឈ្មោះជា ចាន់ថុង ភេទប្រុស អាយុ១៦ឆ្នាំ រស់នៅភូមិប៉ាតឡាង ឃុំក្រាំងលាវ ស្រុករលាប្អៀរ របួសស្រាល ។ ៤- ឈ្មោះហែម យ៉ុន ភេទស្រី អាយុ៤៧ឆ្នាំ រស់នៅភូមិស្អង ឃុំប្រស្និប ស្រុករលាប្អៀរ របួសធ្ងន់។

សមត្ថកច្ចបានឲ្យដឹងថា នៅមុនពេលកើតហេតុ មានម៉ូតូមួយគ្រឿង ម៉ាកហុងដា សេ ១២៥ ពាក់ស្លាកលេខ កំពង់ឆ្នាំង ១C-៩០៧៦ ជិះគ្នា២នាក់ធ្វើដំណើរក្នុងទិសដៅពីលិចទៅកើត នៅពេលមកដល់ចំណុចកើតហេតុ ក៍បានរេចង្កូតទៅបុកម៉ូតូម៉ាកហុងដាវ៉េវ អត់ស្លាកលេខ ឌុបគ្នាពីរនាក់ ដែលកំពុងធ្វើដំណើរច្រាស់ទិសគ្នា បុកគ្នាពេញមួយទំហឹង បណ្តាលឲ្យអ្នកបើកបរម៉ូតូ វ៉េវស្លាប់ម្នាក់ភ្លាមៗ និង រងរបួសធ្ងន់ស្រាល៣នាក់ ។

ក្រោយពេលកើតហេតុ ជនរងគ្រោះរងរបួសត្រូវបានដឹកយកទៅសង្រ្គោះនៅមន្ទីរពេទ្យខេត្ត ចំណែក មធ្យោបាយបង្ក យកមករក្សាទុកនៅអធិការដ្ឋាននគរបាលស្រុករលាប្អៀរ ដើម្បីរង់ចាំដោះស្រាយតាមនីតិវិធី ៕ ចន្ថា