បើកម៉ូតូពេលព្រលប់ៗជ្រុលចង្កូតបុកម៉ូតូរ៉ឺម៉កដួលបាក់ជើងឆ្វេង

ខេត្តកំពង់ស្ពឺ៖ បុរសម្នាក់ បើកម៉ូតូពេលព្រលប់ៗ មើលមិនឃើញរ៉ឺម៉ក១គ្រឿងកំពុងបើកបញ្ច្រាសទិស បានជ្រុលចង្កូតចំពីមុខពេញទំហឹង បណ្តាលឲ្យដួលម៉ូតូ អ្នកបើកបររងរបួសបាក់ជើងឆ្វេងម្ខាង។

គ្រោះថ្នាក់នេះ បានកើតឡើងកាលពីម៉ោង៧និង៥០នាទីព្រលប់ថ្ងៃសុក្រ ១២រោច ខែមិគសិរ ឆ្នាំរកា នព្វស័ក ព ស ២៥៦១ ត្រូវនឹងថ្ងៃទី១៥ ខែធ្នូ ឆ្នាំ២០១៧ ស្ថិតនៅលើផ្លូវក្រាលកៅស៊ូចេញពីផ្សារស្លាបលែង ឆ្ពោះទៅផ្សារត្រពាំងក្រឡឹង ស្ថិតក្នុងភូមិទួល ឃុំស្វាយរំពារ ស្រុកបរសេដ្ឋ ខេត្តកំពង់ស្ពឺ។

ជនរងគ្រោះឈ្មោះ លន គោ ភេទប្រុស អាយុ២២ឆ្នាំ រស់នៅភូមិត្រពាំងទៀប ឃុំកក់ ស្រុកបរសេដ្ឋ ខេត្តកំពុងស្ពឺ បើកម៉ូតូម៉ាកហុងដាc125 ពណ៌ខ្មៅ ស៊េរីឆ្នាំ២០១៣ ពាក់ស្លាកលេខ ភ្នំពេញ 1BM-1639 ។ ចំណែកម៉ូតូរ៉ឺម៉ក ម៉ាក C125 ពណ៌ខ្មៅ ពាក់ស្លាកលេខ ភ្នំពេញ1D-5954 បើកបរដោយឈ្មោះ ថាត់ ខេម ភេទប្រុស អាយុ៣៤ឆ្នាំ រស់នៅភូមិកណ្តៀង ឃុំស្វាយរំពារ ស្រុកបរសេដ្ឋ ខេត្តកំពង់ស្ពឺ។

ប្រភពនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញជនរងគ្រោះ បើកម៉ូតូបំពាក់កញ្ចក់មើលក្រោយ តែម្នាក់ឯង ទិសដៅពីកើតទៅលិច តែគ្មានពាក់មួកសុវត្ថិភាពទេ។ លុះមកដល់កន្លែងកើតហេតុ បានជ្រុលចង្កូតបុកនឹងម៉ូតូរ៉ឺម៉ក កំពុងបើកបញ្ច្រាសទិសចំពីមុខ ដួលម៉ូតូខូចខាតធ្ងន់ធ្ងរ។ ចំណែកអ្នកបើក បណ្តាលឲ្យបាក់ជើងឆ្វេងម្ខាង។ ដោយឡែកអ្នក បើករ៉ឺម៉ក គ្មានរងរបួសទេ។

ក្រោយកើតហេតុ ប៉ូលិសចរាចរណ៍ បានមកដល់ បញ្ជូនជនរងគ្រោះទៅព្យាបាលរបួសនៅមន្ទីរពេទ្យបង្អែកស្រុកគងពិសី។ ចំណែកវត្ថុតាងទាំង២គ្រឿង សមត្ថកិច្ចដកហូតយកទៅរក្សាទុកនៅអធិការដ្ឋានស្រុកបរសេដ្ឋ រង់ចាំដោះស្រាយនៅពេលក្រោយ៕ សេនាស័ក្តិ