សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្រុមចោរជើងខ្លាំងមានគ្នា៤នាក់ បានធ្វើសកម្មភាពលួចគាស់ទ្វារផ្ទះមន្រ្តីនគរបាលអន្តរគមន៍ពិសេសម្នាក់ ដោយលួចយកម៉ូតូ២គ្រឿង រួចគេចខ្លួនដោយសុវត្ថិភាព កាលពីវេលាម៉ោង២រំលងអធ្រាត្រឈានចូលថ្ងៃទី២៤ខែធ្នូឆ្នាំ២០១៧ នៅចំណុចផ្ទះលេខ៩៧អា ផ្លូវលេខ៨៦ ស្ថិតក្នុងសង្កាត់ស្រះចក ខណ្ឌដូនពេញ។
យោងតាមប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុគេមានក្រុមចោរមួយក្រុមមានគ្នាប្រមាណ៣ទៅ៤នាក់បានធ្វើសកម្មភាពគាស់ផ្ទះមន្ត្រីនគរបាលផ្នែកអន្តរាគមន៍ពិសេសនៃស្នងការដ្ឋាននគរបាលរាជធានីភ្នំពេញម្នាក់ ដោយលួចយកម៉ូតូចំនួន២គ្រឿងម៉ាកស្កូបពី១គ្រឿង ពណ៌ស ពាក់ស្លាកលេខ កំពង់ចាម 1N-5686 និងម៉ាកហុងដាឌ្រីម១គ្រឿង ពណ៌ខ្មៅ ពាក់ស្លាកលេខ ព្រះសីហនុ 1A-0201 ដោយសុវត្តិភាពមិនរំខានសមត្ថកិច្ចក្នុងមូលដ្ឋានឡើយ។
ក្រោយកើតហេតុសមត្ថកិច្ចចុះទៅដល់ទីតាងកើតហេតុ ធ្វើការត្រួតពិនិត្យមើលក្រែងមានសល់ស្នាកស្នាមអ្វីខ្លះ នឹងនាំជនរងគ្រោះទៅដាក់ពាក្យបណ្ដឹងនៅប៉ុស្តិ៍ដើម្បីធ្វើការស្រាវជ្រាវកំណត់មុខសញ្ញាជនសង្ស័យផងដែរ ៕ ស តារា
