សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ នៅថ្ងៃអង្គារ ៩កើត ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៦ ខែធ្នូ ឆ្នាំ២០១៧ វេលាម៉ោង ១២និង៣០នាទី លើផ្លូវជាតិលេខ៤ ចន្លោះគីឡូម៉ែត្រ ១២៧-១២៨ ស្ថិតនៅក្នុងភូមិវាល ឃុំកំពង់សិលា ស្រុកកំពង់សិលា ខេត្តព្រះសីហនុ មានករណីគ្រោះថ្នាក់ចរាចរណ៍មួយកើតឡើង រវាង រថយន្ត ០១គ្រឿងម៉ាក LAND CRIUSER ពណ៌ ខ្មៅ ពាក់ស្លាកលេខ ខ.ម 2-5355 បើកបរដោយឈ្មោះ ស្រេង សុខលី ភេទ ប្រុស អាយុ ២៤ឆ្នាំ មានទីលំនៅភ្នំពេញ មានទិសដៅពីភ្នំពេញ ឆ្ពោះមក ខេត្តព្រះសីហនុ លុះដល់ចំណុចខាងលើក៏បានបុកនឹងម៉ូតូ ០១គ្រឿងម៉ាក HONDA WAVE ពណ៌ ក្រហម គ្មានផ្លាកលេខ បើកបរដោយឈ្មោះ មាស សុខា ភេទ ប្រុស អាយុ ២៤ឆ្នាំ មានទីលំនៅស្រុករមាសហែក ខេត្តស្វាយរៀង បើកបរឆ្លងកាត់ផ្លូវពី កើត ទៅ លិច ។
គ្រោះថ្នាក់នេះបណ្ដាលឲ្យរងរបួសមធ្យមមនុស្សម្នាក់ឈ្មោះ មាស សុខា អ្នកបើកបរម៉ូតូ បានបញ្ជូនទៅព្យាបាលនៅមណ្ឌលសុខភាពស្រុកកំពង់សិលា ។
រីឯវត្ថតាង រថយន្ត និង ម៉ូតូ បានយកមករក្សាទុកនៅអធិការដ្ឋាននគរបាលស្រុកកំពង់សិលា៕ ឆ្លាម សមុទ្រ
