សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ប្រុស ស្រី៣នាក់ រងរបួសធ្ងន់ស្រាល ដោយករណីគ្រោះថ្នាក់ចរាចរណ៍រវាងម៉ូតូ នឹងម៉ូតូបុកគូទពីក្រោយពេញទំហឹងកាល ថ្ងៃអាទិត្យ ១៤កើត ខែបុស្ស ឆ្នាំរកា ព.ស.២៥៦១ ត្រូវនឹងថ្ងៃទី៣១ ខែ ឆ្នូ ឆ្នាំ២០១៧ វេលាម៉ោង៧និង១០នាទីយប់ នៅចំណុចលើផ្លូវជាតិលេខ១គីឡូម៉ែត្រលេខ១៤១ លេខ១៤២ស្ថិតក្នុងភូមិក្បាលថ្នល់ ឃុំកណ្តៀងរាយ ស្រុកស្វាយទាប ខេត្ត ស្វាយរៀង ។
សមត្ថកិច្ចនគរបាលស្រុកបានឲ្យនគរវត្តដឹងថា ភាគីខាងម៉ូតូបង្កហេតុមានម្ចាស់ឈ្មោះ វ៉េង និមល ភេទប្រុស អាយុ៣០ឆ្នាំ ជនជាតិខ្មែរ មុខរបរ កម្មករ មានទីលំនៅ ភូមិថ្នល់កែង ឃុំកណ្តៀងរាយ ស្រុកស្វាយទាប ខេត្តស្វាយរៀង ចំណែកម៉ូតូម៉ាក ស្មាក់វី ពណ៌ស ខ្មៅ ស្លាកលេខ ភ្នំពេញ ១DD ០៤៧៣ ខូចខាតយ៉ាងដំណំ។
ប្រភពបន្តថា ចំពោះម៉ូតូភាគីរងគ្រោះមានឈ្មោះ យស់ ន័យ ភេទប្រុស អាយុ ៣៩ឆ្នាំ ជនជាតិខ្មែរ មុខរបរ គ្រូបង្រៀន និងអ្នករួមដំណើរ ឈ្មោះ សួស ថារី ភេទស្រី អាយុ២៦ឆ្នាំ មុខរបរ កម្មករមានទីលំនៅ ភូមិស្វាយផ្អែម ឃុំស្វាយអង្គ ស្រុកស្វាយជ្រំ ខេត្តស្វាយរៀង។
តាមសាក្សីបានឲ្យដឹងថា មុនកើតហេតុ មានម៉ូតូម៉ាក ហុងដាឌ្រីម ស៊េរីឆ្នាំ ២០១៨ ពណ៌ខ្មៅ ស្លាកលេខ ស្វាយរៀង ១K ២៣៤២ ម៉ូតូជិះគ្នា២នាក់ ដោយធ្វើដំណើរទិសដៅពីកើតទៅលិចលើផ្លូវជាតិលេខ១ ខណៈនោះស្រាប់តែមាន ម៉ូតូម៉ាក ស្មាក់វី ពណ៌ស ខ្មៅ មួយគ្រឿងមកពីក្រោយស្របទិសគ្នាបុកពេញទំហឹងបណ្ដាលឲ្យដួលរណូករណែល ទាំងសងខាងបង្កឲ្យមានការភ្ញាក់ផ្អើលដល់អ្នកធ្វើដំណើរជួយដឹកមកកាន់មន្ទីរពេទ្យបង្អែកស្វាយទាប។
ចំពោះមធ្យោបាយទាំង២គ្រឿងត្រូវបាននគរបាលជំនាញយកមករក្សាទុកនៅអធិការដ្ឋាននគរបាលស្រុក និងកសាងសំណុំរឿងតាមច្បាប់ ៕ យឹម សុថាន
