Arsenal កាន់តែឃ្លាតឆ្ងាយក្នុងការប្រជែង Top 4 ក្រោយស្មើជាមួយ Chelsea

ការ​ប្រកួត​សប្ដាហ៍​ទី​២២​ ដែល​ធ្វើ​ឡើង​នៅ​កីឡដ្ឋាន Emirates ​គូ​ប្រជែង​ក្រុម​ Top 4 ទាំង​ពីរ​គឺ រវាង​ក្រុម​ខ្លាំងកាំភ្លើងធំ​ Arsenal នឹងតោខៀវ​ Chelsea បាន​បញ្ចប់​ក្នុង​លទ្ធផល​ស្មើ​គ្នា​ ២-២ ប៉ុណ្ណោះ​កាលពីរាត្រីថ្ងៃទី៣ ខែមករា។ ក្រុម​ Chelsea មាន​ឱកាស​លេង​មុខ​ទី​ Arsenal ច្រើន​លើក​ពិសេស​ ការ​ស៊ុត​របស់​ Morata ២​ដង​ច្បាស់​ៗ​តែ​ធ្វើ​មិន​បាន​សម្រេច​។ ចំណែកក្រុមម្ចាស់​ផ្ទះ​វិញ​ក៏​គាប​សង្កត់​ក្រុម​ភ្ញៀវ​ខ្លាំង​ណាស់​ដែរ​ តែ​មិន​មាន​សំណាង​ដោយ​បាល់​បុក​បង្គោល​ទី​ និង​មួយ​បាល់​ទៀត​ជា​ការ​ស៊ុត​របស់​ Lacazette ត្រូវ​អ្នក​ចាំ​ទី​ជួយ​សង្គ្រោះ​បាន។​

​វគ្គ​ទី​ពីរ​នៅនាទីទី​៦៣​កីឡាករ Wilshere បាន​​ស៊ុត​បោក​បង្គោល​ចូល​ទី​១​គ្រាប់​ឲ្យ​ Arsenal នាំ​មុខ​ ប៉ុន្តែ​រំលង​​៤​នាទី Hazard ប៉េណាល់ទី​តាម​ស្មើ​ឲ្យ​ Chelsea បន្ទាប់​ពី Bellerín ធ្វើ​រូប​គេ​ឲ្យ​ដួល​នៅ​ក្នុង​ប្រអប់​គ្រោះ​ថ្នាក់។ នៅ​នាទីទី​៨៤កីឡាករ​ Zappacosta ដែល​ទើប​ប្ដូរ​ចូល​បាន​បញ្ជូន​ឲ្យ Alonso ស៊ុត​នាំ​មុខ​វិញ​ម្ដង​ ប៉ុន្តែ​ចុង​ម៉ោង​នាទី​៩០+២​ទៅ​ហើយ​កីឡាករ Bellerín បាន​ទាត់​មួយ​ជើង​ចូលតាមស្មើ​ក្រុមភ្ញឿវវិញ។ ធ្វើឲ្យចប់ការប្រកួតក្រុមកាំភ្លើងធំ និងក្រុមតោ ខៀវទទួលបានម្នាក់១ពិន្ទុ។

ក្នុងការប្រកួតនោះដែរកីឡាករខ្សែការពារ Bellerin ហាក់ដូចជានឹងត្រូវក្លាយជាអ្នកដែលគួរតែស្តីបន្តោស សម្រាប់ការចាញ់របស់ក្រុម Arsenal ទៅហើយ ក្រោយពីការប្រព្រឹត្តកំហុសរបស់ខ្សែការពារអេស្ប៉ាញរូបនេះ ទៅលើខ្សែបម្រើស្លាប Eden Hazard បានធ្វើឲ្យមានបាល់ប៉េណាល់ទី ដែលបានអនុញ្ញាតឲ្យ Chelsea រកគ្រាប់បាល់តាមស្មើគ្រាប់បាល់បើកឆាករបស់ Jack Wilshere។ នៅពេលដែលខ្សែការពារ Marcos Alonso បានជួយឲ្យក្រុម Chelsea រកបានគ្រាប់បាល់នាំមុខវិញ នៅរយៈពេល៦នាទីចុងក្រោយ នាកីឡដ្ឋាន Emirates ភាពវេទនារបស់ Bellerin ហាក់ដូចជាត្រូវស្ថិតក្នុងកម្រិតដ៏ធំទៅហើយ។ ប៉ុន្តែ ខ្សែការពារវ័យ ២២ឆ្នាំរូបនេះ បានជួបពេលវេលាដ៏រីករាយវិញនៅនាទី ទី៩០ ខណៈដែលរូបគេបានរកគ្រាប់បាល់ទី២ របស់គេនៅរដូវកាលនេះ។

សូមបញ្ជាក់ថា ក្រុមតោខៀវ Chelsea នៅតែស្ថិតក្នុងចំណាត់ថ្នាក់លេខ៣ ដដែលដោយដេញតាមពីក្រោយក្រុម Manchester United ១ពិន្ទុ និង១៦ពិន្ទុតាមពីក្រោយក្រុមកំពុងនាំមុខ Manchester City។ ដោយឡែក ក្រុម Arsenal ដែលបច្ចុប្បន្នឈ្នះតែ១លើកគត់ក្នុងចំណោមការប្រកួតលីក១៣លើកជាមួយនឹងក្រុម Chelsea នោះ កំពុងតែស្ថិតក្នុងចំណាត់ថ្នាក់លេខ៦ ដោយមាន៥ពិន្ទុតាមពីក្រោយក្រុមឈរលេខ៤ Liverpool ក្នុងការប្រជែងយកកៅអីទៅលេងក្នុងក្របខ័ណ្ឌ Champions League រដូវកាលក្រោយ។

ខាងក្រោមនេះគឺជាលទ្ធផលនៃការប្រកួតកាលពីថ្ងៃទី៣ ខែមករា ឆ្នាំ២០១៨៖