សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ យ៉ាងហោចបុរសចំនួន ២នាក់បានរងរបួស នៅក្នុងហេតុការណ៍គ្រោះថ្នាក់ចរាចរណ៍មួយ រវាងរថយន្តសេរីទំនើបម៉ាក អូឌី និងរថយន្តធុនធំប្រភេទយីឌុប ខណៈកំពុងធ្វើចរាចរណ៍បញ្រ្ចាស់ទិសគ្នា។
ហេតុការណ៍ខាងលើបានកើតឡើងពីវេលាម៉ោងរំលងអាធ្រាត្រឈានចូលថ្ងៃចន្ទ ៧រោច ខែបុស្ស ឆ្នាំ រកា នព្វស័ក ព.ស. ២៥៦១ ត្រូវនឹងថ្ងៃទី៨ ខែមករា ឆ្នាំ ២០១៨ នៅលើកំណាត់ផ្លូវជាតិលេខ៥ ត្រង់ចំណុចទល់មុខស្នាក់ការសាខាគយពោធិ៍សាត់ ស្ថិតក្នុងភូមិត្នោតទ្រេត សង្កាត់ផ្ទះព្រៃ ក្រុង-ខេត្តពោធិ៍សាត់។
ប្រភពព័ត៌មានពីមន្រ្តីជំនាញផ្នែកនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តពោធិ៍សាត់បានឲ្យដឹងថា ហេតុការណ៍គ្រោះថ្នាក់ចរាចរណ៍នេះអាចបង្កឡើងដោយអ្នកបើកបររថយន្តម៉ាក ហុីយ៉ាន់ដាយ ពណ៌សលាយផ្ទៃមេឃ ពាក់ស្លាកលេខ ភ្នំពេញ 3D 2582 ឈ្មោះ ញាញ់(រត់គេចបាត់) ធ្វើចរាចរណ៍មិនប្រកាន់ស្ដាំ ខណៈក្នុងទិសដៅពីលិចទៅកើត លុះដល់ចំណុចកើតហេតុបានបុកជាមួយរថយន្តសេរីទំនើបម៉ាក អូឌី ពណ៌ស ពាក់ស្លាកលេខ ភ្នំពេញ 2AP 6886 ខណៈដែលកំពុងធ្វើដំណើរច្រាសទិសគ្នា(កើតទៅលិច) បណ្ដាលឲ្យភាគ្គីរថយន្តម៉ាក អូឌី រងរបួសចំនួន ២នាក់។
ប្រភពព័ត៌មានខាងលើបន្តថា ជនរងរបួសខាងភាគ្គីរថយន្តម៉ាក អូឌី អ្នកបើកបរឈ្មោះ ម៉ៅ មនោ ភេទប្រុស អាយុ ២៧ឆ្នាំ ជនជាតិខ្មែរ រស់នៅភូមិរ៉ា សង្កាត់ផ្ទះព្រៃ ក្រុង-ខេត្តពោធិ៍សាត់(របួសស្រាល) និងអ្នករួមដំណើរឈ្មោះ ពឹង យូហួត ភេទប្រុស អាយុ ២៩ឆ្នាំ ជនជាតិខ្មែរ មានទីលំភូមិ.សង្កាត់ជាមួយគ្នា(របួសធ្ងន់) ជនរងរបួសត្រូវបានគេបញ្ជូនទៅសង្រ្គោះភ្លាមៗនៅមន្ទីរពេទ្យបង្អែកខេត្តពោធិ៍សាត់។
ប្រភពព័ត៌មានដដែលខាងលើបន្តទៀតថា ករណីគ្រោះថ្នាក់ចរាចរណ៍រវាងរថយន្តសេរីទំនើបម៉ាក អូឌី និងរថយន្តធុនធំប្រភេទយីឌុបម៉ាក ហុីយ៉ាន់ដាយ វត្ថុតាងរថយន្តទាំងចំនួន ២គ្រឿង បានយកទៅរក្សាទុកជាបណ្ដោះអាសន្ន នៅស្នងការដ្ឋាននគរបាលក្រុងពោធិ៍សាត់ ដើម្បីរងចាំបន្តដោះស្រាយគ្នាតាមនីតិវិធី៕ បឹុម ពិន
