ឃាត់ខ្លួនជនសង្ស័យ២នាក់ក្នុងចំណោមបក្ខពួក៥នាក់ ក្រោយធ្វើសកម្មភាពឆក់កាបូបនារីម្នាក់

ភ្នំពេញ៖ កម្លាំងនគរបាលប៉ុស្តិ៍ផ្សារដេប៉ូទី៣ បានឃាត់ខ្លួនជនសង្ស័យ២នាក់ក្នុងចំណោមបក្ខពួក៥នាក់ បានជិះម៉ូតូ៣គ្រឿងធ្វើសកម្មភាពឆក់កាបូបស្ពាយពីនារីម្នាក់កំពុងដើរតាមផ្លូវបានសម្រេចហើយព្យាយាមជិះរត់គេចខ្លួនតែត្រូវប្រជាពលរដ្ឋនៅក្បែរនោះឃើញហេតុការណ៍ក៏នាំគ្នាដេញចាប់បាន២នាក់ ចំណែកបក្ខពួក៣នាក់ទៀតរត់គេចខ្លួនបាត់រួមទាំងកាបូបនារីរងគ្រោះទៅជាមួយផងដែរ ។

ករណីឆក់កាបូបស្ពាយខាងលើនេះ បានកើតឡើងកាលពីវេលាម៉ោង៩យប់ នៅថ្ងៃអាទិត្យ ១៣រោច ខែបុស្ស ឆ្នាំរកា នព្វស័ក ព.ស២៥៦១ ត្រូវនិងថ្ងៃទី១៤ ខែមករា ឆ្នាំ២០១៨ ប្រព្រឹត្តនៅចំណុចមុខផ្ទះលេខ៤២BEo ផ្លូវលេខ២៣៣ កែង១១២ ក្រុមទី១៣ ភូមិ៤ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។

ជនសង្ស័យទាំង២នាក់នេះទី១-ឈ្មោះ សុវណ្ណ ដេវីត ហៅ វីត ភេទប្រុស អាយុ១៨ឆ្នាំ ជនជាតិខ្មែរ មុខរបរ ពុំពិតប្រាកដ ស្នាក់នៅផ្ទះជួលពុំចាំលេខ ផ្លូវលេខ៥៩៨ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ទី២-ឈ្មោះ សុខ សំណាង ហៅ ណាង ភេទប្រុស អាយុ១៦ឆ្នាំ ជនជាតិខ្មែរ មុខរបរ សិស្សថ្នាក់ទី១១A2 វិទ្យាល័យឥន្ទ្រទេវី ស្នាក់នៅផ្ទះជួល ផ្លូវហាណូយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ចំណែកជនរងគ្រោះឈ្មោះ វី គន្ធី ភេទស្រី អាយុ២៣ឆ្នាំជនជាតិខ្មែរ មុខរបរ មេផ្ទះ ស្នាក់នៅផ្ទះជួល ផ្លូវ សង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ ។

សម្ភារបាត់បង់មាន៖ កាបូបស្ពាយមួយពណ៌ខ្មៅ ក្នុងនោះមាន ទូរស័ព្ទមួយគ្រឿងម៉ាក Nokia 1280 ពណ៌ខ្មៅ ចំនួន០១គ្រឿង , លុយខ្មែរចំនួន៥០.០០០៛ (ប្រាំមុឺនរៀល ) ។

វត្ថុតាងចាប់យកមាន ៖ ម៉ូតូមួយគ្រឿងម៉ាក Honda Beat ស៊េរី2017 ពណ៌ក្រហម-ស ពាក់ស្លាកលេខ ភ្នំពេញ 1GR-9956 មានលេខតួ : 9001881 និងលេខម៉ាស៊ីន: 9002965 (ចាប់យកពីឈ្មោះ សុខ សំណាង ជាម៉ូតូជិះធ្វើសកម្មភាពឆក់ ) ។

យោងតាមប្រភពព័ត៌មានពីសមត្ថកិច្ចមូលដ្ឋាន បានឲ្យដឹងថា មុនពេលកើតហេតុ នៅថ្ងៃទី១៤ ខែមករា ឆ្នាំ២០១៨ វេលាម៉ោងប្រហែល ៨និង៥០នាទីយប់ ជនរងគ្រោះបានដើរចេញពីផ្ទះសំណាក់សំរិទ្ធឧត្តម តាមបណ្ដោយផ្លូវលេខ២៣៣ ពីត្បូងទៅជើង ក្នុងគោលបំណងទៅទិញអាហារយកមកញាំ លុះពេលជនរងគ្រោះបានដើរមកដល់ចំណុចមុខផ្ទះលេខ៤២BEo ផ្លូវលេខ២៣៣ កែង១១២ ក្រុមទី១៣ ភូមិ៤ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ស្រាប់តែមានជនសង្ស័យឈ្មោះ សុវណ្ណដេវីត ហៅ ដេវីត និង ឈ្មោះ សុខ សំណាង ហៅ ណាង បានជិះម៉ូតូម៉ាក Honda Beat និងបក្សពួក ចំនួន០៥នាក់ទៀតជិះម៉ូតូចំនួន០៣ គ្រឿងម៉ាក Honda C125 ស៊េរី2018 ពណ៌ខ្មៅ ពីរគ្រឿង និងម៉ូតូម៉ាក Honda C125 ស៊េរី2015 ពណ៌ខ្មៅ ដោយជនសង្ស័យមានគ្នា០២នាក់ជាអ្នក បើកម៉ូតូHondaC125ស៊េរី2018 ពណ៌ខ្មៅ បានធ្វើសកម្មភាពឆក់កាបូបស្ពាយពីជនរងគ្រោះឈ្មោះ វី គន្ធី ហើយបើកម៉ូតូគេចខ្លួន ពេលនោះក៏មានអ្នកជិតខាងបានស្រែកថាចោរៗ ភ្លាម នោះក៏មានប្រជាពលរដ្ឋឈ្មោះ ឃឹម សុខា ភេទប្រុស អាយុ២៦ឆ្នាំ ជនជាតិខ្មែរ កំពុងឈរលេងនៅផ្លូវ ឃើញសកម្មភាព បានរត់ទៅទាញចាប់ជនសង្ស័យឈ្មោះ សុវណ្ណ ដេវីត និងឈ្មោះ សុខ សំណាង ដែលជាអ្នកបិទគូទ យកមកប្រគល់ឲ្យសមត្ថកិច្ចនគរបាលប៉ុស្តិ៍រដ្ឋបាលផ្សារដេប៉ូទី៣ ចាត់ការតាមផ្លូវច្បាប់តែម្ដង ចំណែកបក្សពួក០៥នាក់ជិះម៉ូតូ០៣គ្រឿងទៀតយកកាបូបស្ពាយជនរងគ្រោះគេចខ្លួនបាត់ ។

បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្ដោះអាសន្ន នៅអធិការដ្ឋាននគរបាលខណ្ឌទួលគោក ដើម្បីសាកសួរ កសាងសំណុំរឿង និងបញ្ជូនជនសង្ស័យទៅសាលាដំបូងរាជធានីភ្នំពេញ ចាត់ការតាមនីតិវិធីច្បាប់ ៕ ស តារា

ស្ត្រីរងគ្រោះម្ចាស់កាបូប