សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ហេតុការណ៍ភ្ញាក់ផ្អើលមួយបានកើតឡើង បន្ទាប់ពីបុរសវ័យ៦៩ឆ្នាំម្នាក់បានបើករថយន្តទៅបុកទ្វារផ្ទះនិឹងគំរាមដុតផ្ទះរបស់ខ្លួន ខណៈដែរគាត់ខឹងនឹងកូនស្រីរបស់គាត់ បានធ្វើសកម្មភាពលួចយកគ្រឿងអង្កាលទៅលក់បាត់អស់ កាលពីវេលាម៉ោង០៧និង៥០នាទីយប់ ថ្ងៃទី១៩ ខែមករា ឆ្នាំ២០១៨ ត្រង់ចំណុចផ្ទះលេង១៧A ក្រុមទី២ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ។
លោកអ៊ុំដែលបង្កហេតុនោះឈ្មោះ រស់ រំដួល ភេទប្រុស អាយុ៦៩ឆ្នាំ និងប្រពន្ធឈ្មោះ ម៉ី រឿន អាយុ៦៦ឆ្នាំ មុខរបរលក់អីវ៉ាន់នៅផ្ទះ ស្នាក់នៅជាមួយគ្នានៅទីតាំងកើតហេតុ ដោយមានកូន៦នាក់ ក្នុងនោះប្រុសម្នាក់ ។
តាមប្រភពព័ត៌មានពីប្រជាពលរដ្ឋនៅក្បែរកន្លែងកើតហេតុ បានឲ្យដឹងថា កាលពីល្ងាចមុខពេលកើតហេតុ គេឃើញបុរសវ័យចំណាស់ជាជនបង្ក បានឈ្លោះប្រកែកគ្នាជាមួយប្រពន្ធ និងវាយកម្ទេចទ្រព្យសម្បត្តិនៅក្នុងផ្ទះ និងបានយកកាំបិតចុងស្រួចចំនួនពីរដើម មកអង្គុយសំលៀងនៅខាងមុខផ្ទះតែម្នាក់ឯង បណ្តាលឲ្យភ្ញាក់ផ្អើលដល់អ្នកនៅក្បែរខាងផងដែរ ។
ប្រភពដដែរ បានបន្តទៀតថា លុះដល់វេលាកើតហេតុ ស្រាប់តែបុរសបង្កហេតុបានឈ្លោះគ្នាជាមួយប្រពន្ធ និងកូនម្នាក់ទៀត ហើយបានចូលក្នុងរថយន្តមួយគ្រឿងម៉ាកវីស្តូ ពណ៌ស ពាក់ស្លាកលេខ ភ្នំពេញ ២X-៨៨៤២ ដែលចតនៅក្នុងផ្ទះបានបើកទៅបំបុកទ្វារផ្ទះ បណ្ដាលឲ្យវៀចទ្វារអស់មួយផ្ទាំង និងស្ទុះទៅយកសាំងដែលទិញទុកមកចាក់ពេញផ្ទះ បម្រុងនឹងដុតផ្ទះចោលទៀត ភ្លាមៗនោះក៏ត្រូវប្រជាពលរដ្ឋនិង សមត្ថកិច្ចមូលដ្ឋានបានចុះមកអន្តរាគមន៍ ប៉ុន្តែក្នុងហេតុការណ៍នោះបុរសខាងលើបានកាន់កាំបិតចុងស្រួចចំនួនពីរដើម ហាមមិនឲ្យអ្នកណាចូលមកជិតរូបគាត់នោះទេ បើចូលជិតគាត់នឹងចាក់សម្លាប់ខ្លួនឯង ដោយគាត់និយាយថា «គាត់ចាំចាក់កូនស្រីពៅគាត់ឲ្យងាប់សិន» ។
ដោយឡែកយោងតាមសម្តីប្រពន្ធរបស់បុរសបង្កហេតុ បានឲ្យដឹងដែរថា រូបគាត់មានជំងឺប្រចាំកាយ ហើយមុនពេលកើតហេតុ ប្តីរបស់គាត់បានសួរថា បើឈឺម្លឹងៗ ម្តេចក៏មិនយកគ្រឿងអង្កាលទៅលក់ទៅ ដើម្បីមើលជំងឺទៅ ភ្លាមនោះគាត់ក៏នៅស្ងៀមមិនឆ្លើយតប ប៉ុន្តែបុរសជាប្តីនៅតែសួរដដែលៗ រហូតគាត់ឆ្លើយប្រាប់ថា ខ្សែក.ខ្សែដៃទាំងនោះ ត្រូវបានកូនស្រីពៅយើងលួចយកទៅលក់អស់ហើយ តែគាត់មិនហ៊ានប្រាប់ប្តី ខ្លាចប្តីខឹង ស្រាប់តែពេលនេះប្តីខឹងបានបើករថយន្តបុកផ្ទះធ្វើឲ្យបាក់ទ្វារផ្ទះ រួចហើយបានយកសាំងមកចាក់នៅមុខផ្ទះបម្រុងដុតផ្ទះចោលទៀត ក៏ត្រូវបានអ្នកជិតខាងរាយការណ៍ប្រាប់សមត្ថកិច្ចតែម្តង ។
ក្រោយពេលកើតហេតុ សមត្ថកិច្ចមូលដ្ឋាននិងប្រជាពលរដ្ឋបានសម្របសម្រួល រហូតដល់បុរសបង្កហេតុយល់ព្រមទុកកាំបិតប្រគល់ខ្លួនឲ្យសមត្ថកិច្ចអប់រំ និងណែនាំឲ្យឈប់ធ្វើអំពើបែបនេះទៀត ព្រោះអាចបង្កគ្រោះថ្នាក់ដល់អ្នកដទៃ ៕ស តារា
