ជិះម៉ូតូបញ្រ្ចាសទិសចរាចរណ៍បុកអ្នកលក់កាបូបរបួសម្នាក់

ភ្នំពេញៈ ស្ត្រីអ្នកលក់កាបូបតាមរ៉ឺម៉កម្នាក់បានរងរបួស ខណៈកំពុងដាក់លក់តាមចញ្ចើមផ្លូវត្រូវម៉ូតូមួយគ្រឿងជិះបញ្ច្រាសទិសមកបុកកាលពីវេលាម៉ោង៦និង១៥នាទីល្ងាច ថ្ងៃអង្គារ ៧កើត ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២៣ ខែមករា ឆ្នាំ២០១៨ ស្ថិតនៅតាមបណ្តោយផ្លូវទំនប់កប់ស្រូវក្បែររោងចក្រស្បែកជើង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។

សាក្សីថា ឃើញស្ត្រីម្នាក់លក់កាបូបដាក់លើរ៉ឺម៉កឈរលក់តាមចញ្ចើមផ្លូវ ស្រាប់តែមានម៉ូតូសេរីសង់ឆ្នាំ២០១២ មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 1BJ 4717 ជិះគ្នា៣នាក់បើកបរក្នុងទិសដៅពីត្បូងទៅជើងទាំងបញ្ច្រាសទិសបុកជាមួយអ្នកលក់កាបូបដួលរងរបួសចំជើង។

ក្រោយកើតហេតុ មានការជជែកគ្នាតិងសរសៃក សមត្ថកិច្ចចុះមកអន្តរាគម៍សម្របសម្រួល ទើបជនបង្កព្រមសង១០០$ដើម្បីបញ្ចប់រឿង៕ សុខាសែនជ័យ