សម្តេចតេជោ ហ៊ុន សែន អញ្ជើញជួបលោកប្រធានាធិបតី និងអនុប្រធានាធិបតីឥណ្ឌា

ឆ្លៀតក្នុងឱកាសនោះដែរ សម្តេចតេជោ ហ៊ុន សែន បានជំរាបជូនលោកប្រធានាធិបតី និងលោកអនុប្រធានាធិបតីអំពីលទ្ធផលនៃកិច្ចប្រជុំកំពូលរំលឹកខួបអនុស្សាវរីយ៍លើកទី២៥ឆ្នាំនៃទំនាក់ទំនងក្នុងភាពជាដៃគូសន្ទនាអាស៊ាន -ឥណ្ឌា ពិសេសលទ្ធផលនៃដំណើរទស្សនកិច្ចផ្លូវការរបស់ សម្តេចតេជោនាយករដ្ឋមន្រ្តីផ្ទាល់មកកាន់ទីក្រុងញ៉ូវដែល្លី ដែលថ្នាក់ដឹកនាំនៃប្រទេសទាំងពីរចុះហត្ថលេខាលើឯកសារព្រមព្រៀងសំខាន់ៗមួយចំនួនដើម្បីការពង្រឹងនិងពង្រីកវិស័យសេដ្ឋកិច្ច ពាណិជ្ជកម្ម វប្បធម៌ និងផ្នែកច្បាប់បទដ្ឋានកិត្តិយុត្តិមួយចំនួន ដែលមានអត្ថប្រយោជន៍សម្រាប់ប្រទេសទាំងពីរកម្ពុជា-ឥណ្ឌា។

នៅក្នុងកិច្ចពិភាក្សាថ្ងៃនេះ សម្តេចតេជោនាយករដ្ឋមន្រ្តី ក៏បានអញ្ជើញលោកប្រធានាធិបតី និងលោកអនុប្រធានាធិបតីឥណ្ឌា ទៅបំពេញទស្សនកិច្ចផ្លូវរដ្ឋនៅប្រទេសកម្ពុជាផងដែរដើម្បីរិតចំណងសាមគ្គីភាព មិត្តភាព និងកិច្ចសហប្រតិបត្តិការរវាងប្រទេសទាំងពីរកម្ពុជា-ឥណ្ឌា ឲ្យកាន់តែរឹងមាំ និងរីកចម្រើនទ្វេឡើងថែមទៀត៕