សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តសាំយ៉ុង រត់តាក់ស៊ី មួយគ្រឿង បានបើកបរជ្រុលទៅបុកម៉ូតូនិស្សិតស្រីម្នាក់រៀននៅសាលាវ៉ាន់ដា បណ្តាលឲ្យរបួសធ្ងន់ រួចព្យាយាមបើករត់ ក៏ភ្ញាក់ផ្អើលដល់សមត្ថកិច្ចបោះដៃពេញវិទ្យុទាក់ទង ស្ទាក់ឃាត់បានទាំងតៃកុង និងរថយន្តបង្កបានមកវិញផងដែរ តែពេលនោះអ្នកបើកបររថយន្តបង្ក បានប្រតាយប្រតប់គ្នាជាមួយសមត្ថកិច្ចទៀតផង។
ហេតុការណ៍នេះបានកើតឡើងកាលពីវេលាម៉ោង១១និង៤០នាទីព្រឹក ថ្ងៃ ព្រហស្បតិ៍ ១រោច ខែ មាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១ ខែកុម្ភៈ ឆ្នាំ២០១៨ ស្ថិតនៅចំណុចក្បែរវត្តគោកអំពិល តាមបណ្តោយផ្លូវ៦០ម៉ែត្រ ក្នុងសង្កាត់ជើងឯក ខណ្ឌដង្កោ រាជធានីភ្នំពេញ និងដេញតាមស្ទាក់ចាប់រថយន្តបង្កបាននៅចំណុចក្បែរផ្សារថ្នល់បត់ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ។
សមត្ថកិច្ចមូលដ្ឋានបានឲ្យដឹងថា អ្នកបើកបររថយន្តបង្កមានឈ្មោះ ប៊ុន នី ភេទប្រុស អាយុ៣១ឆ្នាំ មុខរបរបើករថយន្តរត់តាក់ស៊ី ស្នាក់នៅខេត្តព្រៃវែង។ ចំណែកនារីរងគ្រោះមានឈ្មោះ កែន ស្រីណា អាយុ២០ឆ្នាំ ជានិស្សិតរៀននៅសាលាវ៉ាន់ដា ជិះម៉ូតូសេ១២៥ ស្នាក់នៅភូមិរមាត ឃុំកន្តោក ស្រុកណ្តាលស្ទឹង ខេត្តកណ្តាល។
បើតាមអ្នកបើកបររថយន្តបង្ក បាននិយាយថា ករណីគ្រោះថ្នាក់ចរាចរណ៍នេះ គឺខាងម៉ូតូជិះមកចូលមុខរថយន្តរបស់គាត់ ទើបគាត់ជ្រុលទៅបុកតែម្តង ហើយដោយសារតែភ័យពេក ទើបបើករថយន្តរត់គេចដោយមានភ្ញៀវ៤នាក់រួមដំណើរជាមួយ រហូតមកដល់ក្បែរផ្សារថ្នល់បត់ ក៏ត្រូវសមត្ថកិច្ចឃាត់បានតែម្តង។
ក្រោយកើតហេតុ នារីរងគ្រោះត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។ ចំណែកអ្នកបើកបររថយន្តបង្ក រួមនិងម៉ូតូនិងរថយន្ត ត្រូវបានសមត្ថកិច្ចឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌដង្កោ ដើម្បីរង់ចាំធ្វើការដោះស្រាយគ្នាពេលក្រោយតាមច្បាប់បន្តទៀត៕ ភារ៉ា ដង្កោ
