សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ក្រោយមានបណ្តាញព័ត៌មានក្នុងស្រុកជាច្រើនបានចេញផ្សាយព័ត៌មាន ពាក់ព័ន្ឋការតវ៉ារបស់ក្រុមកម្មករសំណង់ ក្រុមហ៊ុន Emariyo ដែលពុំបានទទួលបានប្រាក់ខែរហូតដល់០៣ខែនោះ កាលពីរសៀលថ្ងៃអាទិត្យ ៤រោច ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៤ ខែកុម្ភៈ ឆ្នាំ២០១៨ លោក សោម សុខរ៉ាឌី អគ្គនាយកក្រុមហ៊ុន អ៊ី ម៉ារីយ៉ូ បានបំភ្លឺថា ការយឺតយ៉ាវបើកប្រាក់ខែនេះ គឺមិនមែនក្រុមហ៊ុន ក្ស័យធន់ទេ គឺដោយសារភរិយារបស់លោកបង្ខាំងចរន្តប្រាក់ក្នុងធនាគារ។
ថ្លែងក្នុងកិច្ចសម្ភាសន៍ជាមួយបណ្តាញព័ត៌មាន លោកឧកញ្ញ៉ា សោម សុខរ៉ាឌី អគ្គនាយកក្រុមហ៊ុន អ៊ី ម៉ារីយ៉ូា មានភាគហ៊ុនចំនួន៥១ភាគរយលើ៤៩ភាគរយ ជាមួយលោកស្រី ជួ តារារ៉េត ជាភរិយា បានថ្លែងបញ្ជាក់ថា ក្នុងនាមលោកជាអគ្គនាយកក្រុមហ៊ុន មានភាគហ៊ុនច្រើនជាងលោកស្រី ជួ តារារ៉េត លោកមានការសោកស្តាយយ៉ាងខ្លាំងនូវការខកខានបើកប្រាក់បៀវត្សជូន បុគ្គលិក កម្មកររបស់លោក រហូតដល់ទៅ០៣ខែ ដែលបានធ្វើឲ្យបុគ្គលិក កម្មកររបស់លោក មានការលំបាកយ៉ាងខ្លាំង ប៉ុន្តែការខកខាននេះ មិនមែនលោកគេចវេះ ឬពុំមានភាពទទួលខុសត្រូវនោះទេ គឺដោយសារចរន្តលុយ ក្នុងធនាគារទាំងអស់ ត្រូវបានភរិយារបស់លោក បង្ខាំងមិនព្រមបញ្ចេញសាច់ប្រាក់ សូម្បីតែគណនីផ្ទាល់ខ្លួនរបស់លោក ក៏ភរិយារបស់លោកបង្កកសាច់ប្រាក់ដែរ។
លោកថា ការបង្អាក់ប្រាក់នេះ គឺបន្ទាប់ពីភរិយារបស់លោក បានចាកចេញពីលោកកាលពីចុងខែមករា ឆ្នាំ២០១៧ ដោយចោទថា លោកខិលខូចនៅខាងក្រៅ ហើយភរិយាលោកបានប្រមូលរាល់ឯកសារទាំងអស់ដោយពុំមានការអនុញ្ញាត្តិពីលោក ព្រមទាំងដាក់ពាក្យបណ្តឹងទៅតុលាការ សុំលែងលះ បែងចែកទ្រព្យសម្បត្តិ ថែមទៀតផង។
លោកបន្តថា ចំពោះការសុំលែងលះគ្នាគឺជារឿងបុគ្គល មិនគួរណាធ្វើឲ្យអ្នកដ៏ទៃលំបាកដោយសារខ្លួននោះទេ។ ដូចនេះគួរណាស់លោកស្រី ជួ តារារ៉េត បញ្ចេញសាច់ប្រាក់ក្នុងធនាគារមកសងថ្លៃកម្លាំងពលកម្មរបស់បុគ្គលិក កម្មករ ដែលពួកគាត់ពួកគាត់ចំណាយពេលវេលាច្រើនណាស់ក្នុងការជួយកសាងក្រុមហ៊ុន។
ជុំវិញបញ្ហានេះ ពុំអាចទំនាក់ទំនងសុំការបំភ្លឺពីលោកស្រី ជួ តារារ៉េត បានទេ ព្រោះលេខទូរស័ព្ទពុំមានអ្នកផ្តល់៕ ឆ្លាម សមុទ្រ
