សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ សិស្សសាលាជាង៤០នាក់ តំណាងឲ្យសិស្សជាង១០០នាក់ មកពីវិទ្យាល័យបវេល បាននាំគ្នាផ្ទុះការតវ៉ា នៅក្នុងមន្ទីរអប់រំ យុវជន និងកីឡាខេត្តបាត់ដំបង ខណៈដែលនាយកសាលាស្នើសុំឲ្យមន្ទីរ ដកគ្រូបង្រៀនផ្នែកគណិតវិទ្យាម្នាក់ ទៅធ្វើការនៅកន្លែងផ្សេង។
ការតវ៉ានេះ បានកើតឡើងកាលពីព្រឹក ថ្ងៃទី៦ ខែកុម្ភៈ ឆ្នាំ២០១៨ នៅក្នុងបរិវេណមន្ទីរអប់រំ យុវជន និងកីឡាខេត្តបាត់ដំបង ដែលមានសិស្សានុសិស្សជាង៤០នាក់ តំណាងឲ្យសិស្សជាង១០០នាក់ មកពីវិទ្យាល័យបវេល បានចូលរួមប្រមូលផ្ដុំគ្នា ក្នុងគោលបំណងទាមទារសុំមិនឲ្យផ្លាស់ប្តូរកន្លែងធ្វើការរបស់លោកគ្រូគណិតវិទ្យា ឈ្មោះ រ៉ាត់ សារ៉េត ព្រោះគាត់មិនបានប្រព្រឹត្តទោសកំហុសអ្វីធ្ងន់ធ្ងរនោះទេ។
បើតាមការលើកឡើងរបស់ក្រុមយុវសិស្សថ្នាក់ទី១២ មកពីវិទ្យាល័យបវេលម្នាក់ បានរៀបរាប់ថា លោកគ្រូ រ៉ាត់ សារ៉េត ជាគ្រូឯកទេសផ្នែកគណិតវិទ្យា ថ្នាក់ទី១១ និងទី១២ នៃវិទ្យាល័យបវេល ហើយគាត់បានបង្រៀននៅទីនោះអស់រយៈពេល៧ឆ្នាំមកហើយ និងមានសិស្សចំនួន៣ថ្នាក់ សរុបជិត១៥០នាក់ ដែលបានគាំទ្រ និងរៀនសូត្រជាមួយគាត់មិនគួរណាកំហុសបន្តិចបន្តួច លោកនាយកសាលាស្នើសុំឲ្យខាងមន្ទីរដកគាត់ចេញពីសាលាបែបនេះសោះ។
ក្រុមសិស្សទាំងនោះ បានលើកឡើងថា ការដកលោកគ្រូ រ៉ាត់ សារ៉េត ចេញនេះ មិនផ្តើមពីការកាប់បំផ្លាញទ្រព្យសម្បត្តិ ក្នុងសាលាទាំងស្រុងនោះទេ តែអាចមកពីគំនុំផ្ទាល់ខ្លួន រវាងលោកគ្រូ រ៉ាត់ សារ៉េត និងនាយកសាលាតែម្តង ព្រោះកាលពីអំឡុងខែធ្នូ ឆ្នាំ២០១៧ កន្លងទៅ មានករណីហឹង្សាមួយកើតឡើង បង្កដោយលោកគ្រូ ហ៊ួ វុទ្ធី ជានាយកសាលា បានយកអំបិលម្ទេសញាត់មាត់សិស្សស្រីម្នាក់ ខណៈដែលសិស្សម្នាក់នោះបានយកម្ជូរទៅហូបនៅក្នុងបន្ទប់រៀន ហើយកំពប់លើតុ ទើបលោកគ្រូ រ៉ាត់ សារ៉េត បានឃើញនូវទង្វើរមិនគប្បីនៃថ្នាក់ដឹកនាំសាលាបែបនេះ ក៏បានប៉ះពាល់ពាក្យសម្ដីគ្នា។
លោក ហ៊ួ វុទ្ធី ជានាយកសាលាវិទ្យាល័យបវេល បានលើកឡើងថា មូលហេតុដែលលោកស្នើឲ្យខាងមន្ទីរដកលោកគ្រូ រ៉ាត់ សារ៉េត ចេញពីសាលា ដោយសារមូលហេតុច្រើនព្រោះលោកគ្រូ រ៉ាត់ សារ៉េត និងលោកគ្រូម្នាក់ទៀតឈ្មោះ នាង ចំណាប់ ឯកទេសខាងសីលធម៌ និងពលរដ្ឋមួយចំនួន បានផឹកស្រាស្រវឹង បានកាប់ដើមឈើ និងវាយកម្ទេចសម្ភារៈក្នុងសាលា ហើយមិនត្រឹមតែប៉ុណ្ណោះពួកគាត់ មិនដែលចូលប្រជុំ និងពេលឈប់ម្ដងៗ មិនដែលសុំច្បាប់ ផងដែរ នេះជាការអនុគ្រោះ ដល់គាត់ហើយ ដែលខាងសាលាបានត្រឹមស្នើផ្លាស់ប្តូរគាត់ទៅធ្វើការនៅការិយាល័យស្រុកវិញ មិនដល់ថ្នាក់ព្យួរការងារ ឬបញ្ជូនទៅតុលាការនោះ គឺគ្រាន់តែធ្វើតាមនីតិវិធីវិន័យរបស់វិស័យអប់រំតែប៉ុណ្ណោះ។
ជុំវិញករណីនេះ លោក ងី សែត ប្រធានមន្ទីរអប់រំ យុវជន និងកីឡាខេត្តបាត់ដំបង បានមានប្រសាសន៍ថា ទោសរបស់លោកគ្រូ រ៉ាត់ សារ៉េត ការផឹកស៊ីកាប់បំផ្លាញរបស់សាលា ដែលជាទ្រព្យសម្បត្តិរដ្ឋជាទោសធ្ងន់ធ្ងរ តែដោយសាគាត់ជាគ្រូល្អ ទើបខាងមន្ទីរគ្រាន់តែមានវិធានការស្រាលបំផុត ដែលគ្រាន់តែដកគាត់ដាក់ទៅធ្វើការនៅក្នុងការិយាល័យអប់រំស្រុក តែបើទុកគាត់ និងមានគ្រូដ៏ទៃទៀតយកបំណាំតាម តែបើសិនណាគាត់កែខ្លួនអោយល្អឡើងវិញ និងត្រូវរូវជាមួយលោកគ្រូ អ្នកគ្រូ និងលោកនាយកសាលាវិញ គាត់អាចផ្លាស់ប្ដូរចូលទៅបង្រៀន នៅក្នុងសាលានោះវិញបាន៕
អត្ថបទ និងរូបភាព៖ គេហទំព័រក្នុងស្រុក
