រថយន្តបែនយីឌុបដឹកដីបើកឆ្លងផ្លូវបុកម៉ូតូស្មាស់យុវជនម្នាក់របួសធ្ងន់ធ្ងរ

ភ្នំពេញ៖ រថយន្តបែនដឹកដីមួយគ្រឿង បើកឆ្លងផ្លូវមិនប្រយ័ត្ន ជ្រុលបុកម៉ូតូបណ្តាលអោយយុវជនម្នាក់រងរបួសយ៉ាងធ្ងន់ធ្ងរ ត្រូវបានគេបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ភ្លាមៗ ។

គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៤និង៤៥នាទីរសៀល ថ្ងៃពុធ ៧រោច ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី៧ ខែកុម្ភៈ ឆ្នាំ២០១៨ នៅលើផ្លូវអូរដឹមកប់ស្រូវស្ថិតនៅក្នុងភូមិសំរោង សង្កាត់សំរោងក្រោម ខណ្ឌពោធិ៍សែនជ័យ ។

ជនរងគ្រោះឈ្មោះថា ថាត ហៅព្រឹម មឹក អាយុ២៤ឆ្នាំ មុខរបរជាងសំណង់ មានទីលំនៅក្នុងភូមិតាពូង សង្កាត់ស្នោរ ខណ្ឌពោធិ៍សែនជ័យ ។

តាមប្រភពព័ត៌មានបានឲ្យដឹងថា ជនរងគ្រោះបានជិះម៉ូតូម៉ាកស៊ុយហ្ស៊ុយគីស្មាស់១គ្រឿង ពណ៌ខ្មៅ ពាក់ស្លាកលេខ ភ្នំពេញ 1X-9444 ធ្វើដំណើរក្នុងទិដៅពីត្បូងទៅជើង តាមផ្លូវអូរដឹមកប់ស្រូវ។ ពេលទៅដល់ត្រង់ចំណុចកើតហេតុ ក៏ត្រូវបានរថយន្តបង្កម៉ាក FUSO យីឌុបពណ៌បៃតងឆ្នូតលឿង ប្រភេទបែនដឹកដី ពាក់ស្លាកលេខ ចង្កូតស្ដាំ PP-2565 បើកលឿនក្នុងទិសដៅពីកើតទៅលិច ចេញពីផ្លូវលំបុកពេញទំហឹងបណ្ដាលឲ្យដួលបោកទៅលើថ្នល់រងរបួសធ្ងន់។

បន្ទាប់មករថយន្តបង្កបានបើកថយក្រោយយ៉ាងលឿនចូលទៅតាមផ្លូវលំវិញបានចម្ងាយប្រហែល៣០ម៉ែត្រ ក៏បានឈប់ហើយអ្នកបើកបរបានចុះរត់គេចខ្លួនទៅបាត់។

ក្រោយពេលកើតហេតុនគរបាលចរាចរណ៍ផ្លូវគោករាជធានីភ្នំពេញបាននាំយករថយន្ត និងម៉ូតូទៅរក្សាទុករង់ចាំការដោះស្រាយតាមច្បាប់ ៕ សុខាសែនជ័យ