បើករថយន្តបត់ត្រឡប់ក្រោយមិនប្រយ័ត្នត្រូវម៉ូតូជិះបុកបណ្តាលឲ្យស្ត្រីបីនាក់រងរបួសធ្ងន់ស្រាល

ភ្នំពេញ៖ ស្រ្តីម្នាក់បានរងរបួសធ្ងន់ និងពីរនាក់ទៀតរងរបួសស្រាល បន្ទាប់ពីមានរថយន្តបាឡែនមួយគ្រឿងបើកបត់ត្រឡប់ក្រោយខ្វះកាប្រុងប្រយ័ត្នត្រូវបានស្ត្រីបីនាក់ជិះម៉ូតូបុកពេញទំហឹង ។

ហេតុការណ៍នេះកើតឡើងកាលពីវេលាម៉ោង៦ និង៤០យប់ ថ្ងៃចន្ទ ១២រោច ខែមាឃ ឆ្នាំរកា នព្វស័ក ព.ស. ២៥៦១ ត្រូវ និងថ្ងៃទី១២ ខែកុម្ភៈ ឆ្នាំ២០១៨ ស្ថិតនៅចំណុចមុខភោជនីយដ្ឋាន ជួបគ្នាសំលាញ់ តាមបណ្តោយផ្លូវលេខ៣១៥ ក្នុងសង្កាត់បឹងកក់១ ខណ្ឌទួលគោគ រាជធានីភ្នំពេញ ។

តាមប្រភពព័ត៌មានពីកន្លែងកើហេតុបានប្រាប់ឲ្យដឹងថា មុនកើតហេតុគេឃើញបុរសម្នាក់រួមដំណើរ និងស្ត្រីម្នាក់ទៀតបើករថយន្តមួយគ្រឿងម៉ាកកាមរីបាឡែន ពណ៌ស ពាក់ស្លាកលេខ ភ្នំពេញ 2AB-5909 បើកបរទិសដៅពីជើងត្បូង លុះមកដល់ចំណុចកើតហេតុខាងលើបានបត់ឆ្វេងដៃត្រឡប់ក្រោយ ខណៈនោះក៏មានម៉ូតូមួយគ្រឿងម៉ាកធូដេពណ៌ផ្កាឈូកពាក់ស្លាលេខភ្នំពេញ1FB-1479 ជិះដោយស្ត្រីបីនាក់មកពីក្រោយស្របទិសដៅគ្នាគេចមិនទាន់ជ្រុលទៅបុកចំទ្វាររថយន្តខាងមុខផ្នែកខាងឆ្វេងពេញទំហឹងបណ្តាលស្ត្រីម្នាក់រងរបួសធ្ងន់បាក់ជើងម្ខាងត្រូវបានបញ្ជូនទៅសង្គ្រោះបន្ទាន់ភ្លាមៗ ចំណែកស្រ្តីពីរនាក់រងរបួសស្រាល។ ភ្លាមៗនោះម្ចាស់រថយន្តឃើញសភាពមិនស្រួលបានបើកទ្វាររថយន្តចុះគេចខ្លួនបាត់ស្រមោល។ រីឯម៉ូតូ និងរថយន្តរងកាខូចខាតដូចគ្នា ។

ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកវាស់វែងយករថយន្ត និងម៉ូតូទៅរក្សាទុកនៅអធិការដ្ឋាននគរបាលខណ្ឌទួលគោគរងចាំដោះស្រាយគ្នាទៅតាមផ្លូវច្បាប់ ៕ សុខាសែនជ័យ