សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ បើតាមសេចក្ដីរាយការណ៍បឋម មានជនដែលត្រូវធ្វើការអប់រំ កែប្រែនៅក្នុងមណ្ឌលសំចតសង្គមកិច្ចរាជធានីភ្នំពេញ (ព្រៃស្ពឺ) ប្រមាណ២៤នាក់ បានលួចហែកបន្ទប់រត់ចេញពីមណ្ឌល ហើយត្រូវចាប់បានមកវិញ តែ៣នាក់ប៉ុណ្ណោះ កាលពីយប់មិញ ខណៈនៅមាន២១នាក់ផ្សេងទៀត កំពុងរត់គេចខ្លួនចូលទៅភូមិក្បែរនោះ។
ប្រភពបន្តថា នៅមានជនញៀនថ្នាំ និងជនអានាថា២១នាក់ទៀត កំពុងរត់គេចទៅសម្ងំលាក់ខ្លួននៅភូមិក្បែរមណ្ឌលសំចតព្រៃស្ពឺ ដែលរហូតមកទល់ហ្នឹងព្រឹកថ្ងៃអង្គារនេះ នៅតែគ្មានដំណឹងពីការរកឃើញពួកគេ។ ហេតុការណ៍នេះ បានបង្កការភ្ញាក់ផ្អើលតាំងពីម៉ោង៨យប់ ថ្ងៃទី១២ ខែកុម្ភៈ ឆ្នាំ២០១៨ម្សិលមិញ ដល់អ្នកភូមិនៅក្បែរមណ្ឌលសង្គមកិច្ច ដែលមានទីតាំងនៅតាមបណ្ដោយផ្លូវលំចូលវត្តព្រៃស្ពឺ ស្ថិតក្នុងភូមិស្រែជុំរៅ សង្កាត់ចោមចៅ២ ខណ្ខពោធិ៍សែនជ័យ រាជធានីភ្នំពេញ។
រហូតមកទល់ព្រឹកនេះ ក្រុមសន្តិសុខមណ្ឌល និងប្រជាការពារសង្កាត់ចោមចៅ២ កំពុងសហការគ្នាជាមួយសមត្ថកិច្ចនគរបាលមូលដ្ឋាន តាមស្វែងរកចាប់ខ្លួនជនទាំង២១នាក់នោះមកវិញ។ យ៉ាងណា មិនមានសេចក្ដីរាយការណ៍ណាមួយបញ្ជាក់ពីមូលហេតុ នៃហេតុការណ៍ហែកបន្ទប់រត់ចេញពីមណ្ឌលកែប្រែព្រៃស្ពឺនេះឡើយ ប៉ុន្តែនេះ ហាក់បង្ហាញពីភាពកំសោយក្នុងការគ្រប់គ្រង និងថែរក្សាសន្តិសុខនៅក្នុងមណ្ឌល។
សូមជម្រាបថា មណ្ឌលសង្គមកិច្ចរាជធានីភ្នំពេញ ឬហៅថា មណ្ឌលអប់រំវិជ្ជាជីវៈព្រៃស្ពឺ ស្ថិតនៅសង្កាត់ចោមចៅ២ ខណ្ឌពោធិ៍សែនជ័យ គឺជាកន្លែងដែលអាជ្ញាធរបានចាប់មនុស្សចាស់ និងកុមារនៅតាមចិញ្ចើមផ្លូវ អ្នកគ្មានទីជម្រក អ្នកប្រើប្រាស់គ្រឿងញៀន ស្ត្រីរកស៊ីផ្លូវភេទ និងជនវិកលចរិត ជាដើម យកទៅអប់រំកែប្រែ និងបណ្ដុះបណ្ដាលវិជ្ជាជីវៈ។
កាលពីដើមខែមិថុនា ឆ្នាំ២០១៦ នាឱកាសទិវាកុមារអន្តរជាតិ សម្ដេចនាយករដ្ឋមន្ត្រី ហ៊ុន សែន បានរិះគន់ខ្លាំងៗ ចំពោះការគ្រប់គ្រងមជ្ឈមណ្ឌលព្រៃស្ពឺ ដែលធ្វើឲ្យប៉ះពាល់ដល់មុខមាត់រាជរដ្ឋាភិបាល ហើយលោកបានព្រមានពីលទ្ធភាព ដែលអាចឈានទៅបិទមណ្ឌលព្រៃស្ពឺនេះទាំងស្រុងផងដែរ៕
អត្ថបទ និងរូបភាព៖ គេហទំព័រក្នុងស្រុក
