សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ បន្ទាប់ពីទទួលបានព័ត៌មានភ្លាមៗ ពាក់ព័ន្ធករណីគ្រូពេទ្យបង្អែក ខេត្តកំពង់ចាម វះកាត់ស្ត្រីឆ្លងទន្លេភ្លេចកន្សែងក្នុងពោះនោះ អភិបាលខេត្តកំពង់ចាម លោក គួច ចំរើន បានបញ្ជាឲ្យប្រធានមន្ទីរសុខាភិបាល លោក គឹម សួរភារុណ ឲ្យកោះហៅប្រធានមន្ទីរពេទ្យបង្អែក គ្រូពេទ្យវះកាត់ មកជួបជាមួយភាគីជនរងគ្រោះ នៅវេលា ម៉ោង៣រសៀល ថ្ងៃទី២៤ ខែកុម្ភៈ ឆ្នាំ២០១៨នេះ ដើម្បីធ្វើការ សួរនាំបន្ថែម និងស្តាប់យោបល់ម្នាក់ៗ ។
ជាមួយគ្នានេះ អភិបាលខេត្តកំពង់ចាម ក៏បានប្រាប់ទៅអភិបាលស្រុក កងមាស ឲ្យដឹកនាំមន្រ្តីចុះទៅពិនិត្យស្ថានភាពជនរងគ្រោះ ព្រមទាំងតាមដានលើការព្យាបាលជំងឺរហូតជាសះស្បើយផងដែរ។
សូមបញ្ជាក់ថា ស្រ្តីរងគ្រោះម្នាក់ត្រូវគ្រូពេទ្យភ្លេចក្រណាត់ជូតសំអាតអនាម័យក្នុងពោះអស់រយះពេល៣ខែ ក្រោយពេលសំរាលកូនវះកាត់។
ស្រ្តីរងគ្រោះម្នាក់ត្រូវបានក្រុមគ្រូពេទ្យនៃមន្ទីរពេទ្យបង្អែកខេត្តកំពង់ចាម បង្កការធ្វេសប្រហែសយ៉ាងធ្ងន់ធ្ងរបំផុត ក្នុងពេលវះកាត់សម្រាលកូនបែរជាភ្លេចក្រណាត់ជូតសំអាតអនាម័យក្នុងពោះអស់រយះពេល៣ខែ ។
ចំពោះការឈានទៅដឹងថា មានក្រណាត់អានាម័យនៅក្នុងពោះនេះ បន្ទាប់ពីស្ត្រីរងគ្រោះសំរាលកូនហើយ ចេះតែមានការឈឺចាប់ក្នុងពោះខ្លាំងទៅៗរៀងរាល់ថ្ងៃ អស់រយៈពេលជាង៣ខែទោះប្រើឱសថព្យាបាលយ៉ាងណាក៏មិនបាត់សោះ។ លុះដល់ទ្រាំមិនបាន ក៏សម្រេចចិត្តវះកាត់ម្ដងទៀត តែអ្វីដែលហួសចិត្តយ៉ាងពន់ពេកនោះ មូលហេតុដែលនាំឲ្យស្ត្រីរងគ្រោះមានការឈឺចាប់ គឺមានកូនកន្សែងមួយដែលគ្រូពេទ្យភ្លេចក្នុងពោះ អំឡុងពេលវះកាត់សម្រាលកូននៅមន្ទីរបង្អែកខេត្តកំពង់ចាម ។
ស្ត្រីរងគ្រោះដែលកំពុងស្ថិតក្នុងសភាពធ្ងន់ធ្ងរនេះ មានស្រុកកំណើតនៅភូមិពាមជីកង ឃុំពាមជីកង ស្រុកកងមាស ខេត្តកំពង់ចាម ជាគ្រូបង្រៀននៅវិទ្យាល័យពាមជីកង ហើយខណៈនេះកំពុង សម្រាកព្យាបាល ក្នុងមន្ទីរពេទ្យឯកជនមួយ ក្នុងរាជធានីភ្នំពេញ ជាមួយនឹងការខ្វាយខ្វល់អំពីបញ្ហាអស់លទ្ធភាព ក្នុងការព្យាបាលខ្លួនតទៅទៀត ស្របពេលដែលស្ថានភាព ជំងឺកាន់តែដុនដាបទៅៗ។
ទុក្ខវេទនានេះ ត្រូវបានបញ្ជាក់ឡើងវិញដោយប្អូនស្រីបង្កើតរបស់ជនរងគ្រោះ និងសុំមិនបញ្ចេញឈ្មោះ បានរៀបរាប់តាមដំណើររឿងថា៖
កាលពីជាង៣ខែមុន បងស្រីបង្កើតរបស់ខ្លួនបានទៅសម្រាលកូនដំបូងនៅមន្ទីរបង្អែកខេត្តកំពង់ចាម ពេលនោះគ្រូពេទ្យថា បើសម្រាលតាមធម្មជាតិមិនបានឡើយ ទាល់តែសម្រាលដោយការវះកាត់។ ក្រោយគ្រូពេទ្យប្រាប់យ៉ាងដូច្នេះ ជនរងគ្រោះ និងក្រុមគ្រួសារក៏សម្រេចចិត្តវះតែម្ដង។ ក្រោយសម្រាលមិនបានប៉ុន្មានផង ស្ត្រីរងគ្រោះចេះតែមានការឈឺចុកចាប់ក្នុងពោះរហូត និងខ្លាំងទៅៗ ខណៈការពិនិត្យ និងការប្រើប្រាស់ឱសថតិចច្រើន ក៏បានធ្វើជាបន្តបន្ទាប់ដែរ តែអាការឈឺចាប់នោះមិនព្រមបាត់រសាយទៅវិញសោះ។
ប្អូនស្រីជនរងគ្រោះបានបន្តថា ដោយសារការឈឺចាប់ចេះតែមានសភាពធ្ងន់ធ្ងរទៅៗ ទើបក្រុមគ្រួសារ ក៏សម្រេចចិត្តបញ្ជូនស្ត្រីរងគ្រោះមកមន្ទីរពេទ្យឯកជនមួយ នៅរាជធានីភ្នំពេញ ដើម្បីឆ្លុះមើលរកមូលហេតុ និងព្យាបាល ដល់ពេលឆ្លុះក៏ឃើញមានដុំម្យ៉ាងក្នុងពោះដែរ ប៉ុន្តែពេទ្យប្រាប់ថា ជាដុំក្នុងពោះធម្មតាដូចគេដូចឯងទេ ពោលប្រើតែថ្នាំចាក់ និងលេបទៅ នឹងធូរស្បើយហើយ ប៉ុន្តែមិនដូចការគិតនោះទេ ស្ត្រីរងគ្រោះនៅតែមានការឈឺចាប់ខ្លាំងទៅៗរាល់ថ្ងៃ ក៏សម្រេចចិត្តជាមួយក្រុមគ្រួសារថា វះកាត់ម្ដងទៀត ដើម្បីរកមូលហេតុនៃការឈឺចាប់ដ៏ធ្ងន់ធ្ងរនេះ នាថ្ងៃទី១៩ ខែមករា ឆ្នាំ២០១៨។
ជាមួយនឹងសំឡេងអួលដើមកខ្សាវៗ ប្អូនស្រីជនរងគ្រោះបានថ្លែងថា ក្នុងពេលវះកាត់នោះ ស្រាប់តែឃើញកូនកន្សែងពណ៌សមួយ ប្រឡាក់ឈាមក្រហមឆ្អិនយ៉ាងសម្បើម នៅក្នុងពោះរបស់បងស្រីរបស់ខ្លួន ដែលនេះហើយជាមូលហេតុនាំឲ្យស្ត្រីរងគ្រោះឈឺចុកចាប់ អស់ពេលជាង៣ខែយ៉ាងដូច្នេះ ដែលម្នាក់ៗមានការហួសចិត្តយ៉ាងខ្លាំង ចំពោះការធ្វេសប្រហែសរបស់គ្រូពេទ្យនៅខេត្តកំពង់ចាម អំឡុងពេលស្ត្រីរងគ្រោះសម្រាលកូននោះ។
ដើម្បីបង្ហាញពីការធ្វេសប្រហែសក្នុងន័យជំរុញឲ្យមានការប្រុងប្រយ័ត្នទៅថ្ងៃមុខ ក្រុមគ្រួសារស្ត្រីរងគ្រោះបានជូនដំណឹងទៅមន្ទីរពេទ្យបង្អែកខេត្តកំពង់ចាមដែរ ប៉ុន្តែអ្វីដែលហួសចិត្តនោះ ខាងមន្ទីរពេទ្យ ដែលមានគ្រូពេទ្យម្នាក់អះអាងថា ខ្លួនឯងជាអនុប្រធានមន្ទីរពេទ្យ បានប្រកែកមិនចង់ទទួលស្គាល់ការធ្វេសប្រហែសនេះឡើយ ដោយប្រាប់ថា ចាំសិន លុះដល់២-៣សប្ដាហ៍ក្រោយមក ក្រុមគ្រួសារជនរងគ្រោះបានសាកសួរទៅគ្រូពេទ្យកំពង់ចាម ជាបន្តបន្ទាប់ទៀត តែខាងមន្ទីរពេទ្យនៅតែគ្មានដំណោះស្រាយ ជូនជនរងគ្រោះនៅឡើយ ដោយបញ្ជាក់ថា ចាំគេប្រជុំគ្នាសិន និយាយរួមគ្មានដំណោះស្រាយជូនជនរងគ្រោះ សូម្បីតែប៉ុនក្រចកដៃ។ នេះបើតាមការបន្ថែមរបស់ប្អូនស្រីជនរងគ្រោះ។
ខណៈកំពុងសម្រាកព្យាបាលជំងឺក្នុងមន្ទីរពេទ្យឯកជន នៅរាជធានីភ្នំពេញនេះ ស្ត្រីរងគ្រោះ និងក្រុមគ្រួសារ មានការព្រួយបារម្ភយ៉ាងខ្លាំងចំពោះបញ្ហាអស់លទ្ធភាពក្នុងការព្យាបាលជំងឺ។ ដោយអស់លទ្ធភាព ក្នុងការព្យាបាលជំងឺតទៅទៀត ខណៈស្ថិតក្នុងស្ថានភាពឈឺចុកចាប់ធ្ងន់ធ្ងរពេញប្រាណផងនោះ ស្ត្រីរងគ្រោះ និងក្រុមគ្រួសារ រួមទាំងប្អូនស្រីជនរងគ្រោះ បានលើកដៃទទូចអំពាវនាវដល់ថ្នាក់ដឹកនាំ និងសប្បុរសជននានា មេត្តាផ្ដល់ក្ដីសន្ដោសប្រណីជួយឧបត្ថម្ភព្យាបាលជំងឺធ្ងន់ធ្ងរនេះ ឲ្យបានជាសះស្បើយវិញផង ៕ សុខខេមរា
