សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ នគរបាលប៉ុស្តិ៍រដ្ឋបាលឃុំតាលោប្រាប់ថា នៅវេលាម៉ោង៧ និង៥នាទីយប់ ថ្ងៃអាទិត្យ ២កើត ខែចេត្រ ឆ្នាំ រកា នព្វស័ក ព.ស.២៥៦១ ត្រូវនឹងថ្ងៃទី១៨ ខែមីនា ឆ្នាំ២០១៨ នៅលើកំណាត់ផ្លូវលំក្រាលគ្រួសក្រហម ត្រង់ចំណុចក្បែងក្លោងទ្វារវត្តរហាលទិល ស្ថិតក្នុងភូមិរហាលទិល ឃុំតាលោ ស្រុកបាកាន មានករណីគ្រោះថ្នាក់ចរាចរណ៍មួយបានកើតឡើងម៉ូតូ និងម៉ូតូ ខណៈពេលដែលកំពុងធ្វើដើរបញ្រ្ចាស់ទិសគ្នា បណ្ដាលឲ្យរបួសធ្ងន់ទាំងសង់ខាងចំនួន ០៣នាក់។ លុះនៅវេលាម៉ោង១២ និង២០នាទីថ្ងៃត្រង់ ថ្ងៃចន្ទ ៣កើត ខែចេត្រ ឆ្នាំ រកា នព្វស័ក ព.ស.២៥៦១ ត្រូវនឹងថ្ងៃទី១៩ ខែមីនា ឆ្នាំ២០១៨ នៅលើកំណាត់ផ្លូវលំក្រាលគ្រួសក្រហមដែរនោះ ស្ថិតក្នុងភូមិព្រៃវាំង ឃុំតាលោ ស្រុកបាកាន ក៍មានករណីគ្រោះថ្នាក់ចរាចរណ៍មួយបានកើតឡើងម្តងទៀត រវាងម៉ូតូ និងម៉ូតូ នៅគ្រាដែលកំពុងធ្វើចរាចរណ៍បញ្រ្ចាស់ទិសគ្នាដែរ បណ្ដាលឲ្យរបួសធ្ងន់ទាំងសង់ខាងដូចគ្នាចំនួន ៣នាក់ផងដែរ។
ចំណែក៖ នៅវេលាម៉ោង៨ និង១៥នាទីព្រឹក ថ្ងៃច័ន្ទ ៣កើត ខែចេត្រ ឆ្នាំរកា នព្វស័ក ពុទ្ធសករាជ២៥៦១ ត្រូវនឹងថ្ងៃទី១៩ ខែឆ្នាំដដែល នៅលើកំណាត់ផ្លូវជាតិលេខ៥៥ ស្ថិតក្នុងភូមិស្ទឹងថ្មី ឃុំប្រម៉ោយ ស្រុកវាលវែងឯនេះវិញ ត្រូវបាននគរបាលអធិការដ្ឋានប្រាប់ដែរថា មានករណីគ្រោះថ្នាក់ចរាចរណ៍មួយបានកើតឡើងដែររវាងម៉ូតូបុកត្រាក់ទ័រ នៅពេលកំពុងធ្វើដំណើរស្របទិសគ្នា បណ្ដាលឲ្យជនជាតិជប៉ុនម្នាក់ឈ្មោះ កេន អីណាយ៉ា ភេទប្រុស ៣២ឆ្នាំ របួសបាក់ជើងឆ្វេង។
ដោយឡែក៖ មន្រ្តីជំនាញផ្នែកសណ្ដាប់ធ្នាប់នៃអធិការដ្ឋាននគរបាលស្រុកភ្នំក្រវាញក៍បានឲ្យដឹងបន្ថែមដែរថា នៅវេលាម៉ោង១០ និង៤៤នាទីព្រឹក ថ្ងៃច័ន្ទ ៣កើត ខែចេត្រ ឆ្នាំរកា នព្វស័ក ពុទ្ធសករាជ២៥៦១ ត្រូវនឹងថ្ងៃទី១៩ ខែឆ្នាំដដែល នៅលើកំណាត់ផ្លូវជាតិលេខ៥៥ ត្រង់ចំណុចអង្រ្កង ឃុំសំរោង ស្រុកភ្នំក្រវាញ ក៍មានករណីគ្រោះថ្នាក់ចរាចរណ៍ដែររវាងរថយន្ត ១គ្រឿងម៉ាក កាមរី ចង្កូតស្ដាំ ពណ៏ស្លែ ពាក់ស្លាកលេខ បាត់ដំបង 2A 1778 បុកក្មេងស្រីដើរឆ្លងផ្លូវបណ្ដាលឲ្យស្លាប់យ៉ាងរន្ធត់។ លុះនៅវេលាម៉ោង៨ និង៤៥នាទីយប់ ថ្ងៃដដែល នៅលើកំណាត់ផ្លូវជាតិលេខ៥៥ដែរនោះ ស្ថិតក្នុងភូមិព្រែក១ ឃុំសំរោង ស្រុកភ្នំក្រវាញដដែល ក៍មានករណីគ្រោះថ្នាក់ចរាចរណ៍មួយបានកើតឡើងម្តងទៀត រវាងម៉ូតូជិះឌុបគ្នាបុកគោយន្តកន្រ្តៃដឹកឈើស្របទិសគ្នា(លិចទៅកើត) បណ្ដាលឲ្យស្លាប់អ្នកបើកបរម៉ូតូ ចំណែកអ្នករួមដំណើររបួសធ្ងន់។
ប្រភពព័ត៌មានគ្រោះថ្នាក់ចរាចរណ៍ប៉ុន្មានករណីខាងលើនេះ បណ្ដាលឲ្យមានមនុមានមនុស្សចំនួន ២នាក់ និងរបួសស្រាលធ្ងន់ចំនួន ៨នាក់ ហើយសមត្តកិច្ចនគរបាលបានចាត់ចែងជនរបួស និងស្លាប់ភ្លាមៗផងដែរ ចំពោះវត្ថុតាងដែលបានកើតមានឡើងក៍បានយកទៅរក្សាទុកជាបណ្ណោះអាសន្នផងដែរដើម្បីរងចាំធ្វើការដោះស្រាយគ្នាជាក្រោយ៕ ប៉ឹម ពិន
