ម៉ូតូបើកលឿនពេកបុកម៉ូតូ១គ្រឿងទៀតបើកបញ្ច្រាសគ្នាបណ្តាលអោយរងរបួសធ្ងន់ស្រាល៥នាក់

ខេត្តកំពង់ស្ពឺ៖ មនុស្សប្រុសស្រី៥នាក់ បានរងរបួសធ្ងន់ស្រាល ហើយត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យ មណ្ឌលសុខភាពភ្លាមៗ ខណៈ ដែលយុវជន២នាក់ជិះម៉ូតូលឿនពេក ជ្រុលទៅបុកម៉ូតូសង់១គ្រឿងទៀត ដែលកំពុងតែបើកបញ្ច្រាសទិសគ្នាចំពីមុខយ៉ាងពេញទំហឹង ។

ហេតុការណ៍ម៉ូតូបុកម៉ូតូបានកើតឡើង កាលពីវេលាម៉ោង៥និង៣០នាទីល្ងាច ថ្ងៃអង្គារ ៤កើត ខែចេត្រ ឆ្នាំ រកា នព្វស័ក ព.ស.២៥៦១ ត្រូវនឹងថ្ងៃទី២០ ខែមីនា ឆ្នាំ២០១៨ នៅលើកំណាត់ផ្លូវជាតិលេខ៥១ ត្រង់ចន្លោះបង្គោលគីឡូម៉ែត្រលេខ១៧ទៅលេខ១៨ ស្ថិតនៅក្នុងភូមិស្តុកអក ឃុំចាន់សែន ស្រុកឧដុង្គ ខេត្តកំពង់ស្ពឺ។

មន្ត្រីនគរបាលចរាចរណ៍ស្រុកឧដុង្គបាននិយាយឲ្យដឹងថា នៅមុនពេលកើតហេតុគេបានឃើញយុវជន២នាក់ជិះម៉ូតូ១គ្រឿង ម៉ាក ហុងដា C125 ស៊េរី ឆ្នាំ២០១៨ ពណ៌ខ្មៅ ពាក់ស្លាកលេខ កណ្តាល 1X2554 អ្នកបើកបរមានឈ្មោះពេជ្រ រស់ភេទប្រុសអាយុជាង២០ឆ្នាំ និងរួមដំណើរជាមួយយុវជនម្នាក់ទៀតមិនទាន់ស្គាល់អត្តសញ្ញាណនៅឡើយគ្រាន់តែដឹងថា មានអាយុជាង២០ឆ្នាំដូចគ្នារស់នៅក្នុងភូមិក្រសាំងដុះឡើង ឃុំក្បាលទឹក ស្រុកទឹកផុស ខេត្តកំពង់ឆ្នាំង បានធ្វើដំណើរតាមបណ្តោយផ្លូវជាតិលេខ៥១ក្នុងទិសដៅពីត្បូងទៅជើងក្នុងល្បឿនលឿន លុះធ្វើដំណើរមកដល់ចំណុចកើតហេតុខាងលើបានជ្រុលចង្កូតទៅបុកម៉ូតូ១គ្រឿងទៀតម៉ាកហុងដា C125ស៊េរីឆ្នាំ២០០៤ព៌ណខ្មៅ ផ្លាកលេខ ព្រៃវែង 1A 1699 អ្នកបើកម៉ូតូឈ្មោះ សៅ សុខឃឿនភេទស្រី អាយុ 32 ឆ្នាំ រស់នៅក្នុងភូមិត្រពាំងផ្លុង ឃុំដំណាក់រាំងស្រុកឧដុង្គ អ្នករួមដំណើរ 2 នាក់មិនទាន់ស្គាល់អត្តសញ្ញាណ និងក្មេងស្រីម្នាក់ផងដែរ បណ្តាលឲ្យរងរបួសធ្ងន់ ចំនួន 5 នាក់ក្នុងនោះ ស្រី 3 នាក់។

ក្រោយកើតហេតុនគរបាលជំនាញបានចុះវាស់វែងហៅរថយន្តសាមុយដឹកអ្នករបួសយកទៅសង្គ្រោះភ្លាមៗ ចំណែកម៉ូតូរបស់ជនរងគ្រោះទាំង២គ្រឿងត្រូវបាននគរបាលជំនាញដឹកយកទៅរក្សាទុកនៅអធិការដ្ឋាននគរបាលស្រុកឧដុង្គរង់ចាំដោះស្រាយនៅពេលក្រោយ ៕ សេនា សក្តិ