ពូកែសន្សំរឿងដាក់ខ្លួនម្ល៉េះ? គ្រាន់តែគេមើលមុខ ជិះម៉ូតូតាមស្ទាក់ឲ្យឈប់ហើយទះកំភ្លៀង៣ដៃ

ភ្នំពេញ៖ ហេតុការណ៍ភ្ញាក់ផ្អើលមួយ បន្ទាប់ពីបុរស២នាក់ទំនងស្រវឹងស្រារៀងៗខ្លួន ជិះម៉ូតូងាកមើលមុខភាគីម្ខាងទៀតខឹងក៏ដេញមកស្ទាក់មុខឈប់ម៉ូតូ រួចទះ៣ដៃទៅលើជនរងគ្រោះ កាលពីវេលាម៉ោង១១និង៣០នាទីយប់ ថ្ងៃព្រហស្បតិ៍ ៦កើត ខែចេត្រ ឆ្នាំ រកា នព្វស័ក ព.ស.២៥៦១ ត្រូវនឹងថ្ងៃទី២២ ខែមីនា ឆ្នាំ២០១៨ នៅចំណុចផ្លូវលេខ៩៩ កែងផ្លូវលេខ៤៦៦ ស្ថិតក្នុងសង្កាត់បឹងត្របែក ខណ្ឌចំកាមន រាជធានីភ្នំពេញ។

តាមសម្តីបុរសដែលត្រូវគេវាយ បានឲ្យដឹងថា មុនពេលកើតហេតុរូបគាត់បានចេញពីផឹកសុីជាមួយមិត្តភក្តិ ហើយជិះម៉ូតូម៉ាកPCX ពណ៌ ស ពាក់ស្លាកលេខភ្នំពេញ1FF 6607 ធ្វើដំណើរតាមបណ្តោយផ្លូវលេខ៩៩ ក្នុងទិសដៅពីជើងទៅត្បូង ខណៈមកដល់ចំណុចកើត ដោយផ្លូវបំបែកជាបួនក៏បង្អង់មើលឆ្វេងស្តាំ ស្របពេលបុរសម្នាក់ជិះម៉ូតូម៉ាកណៃហត ពណ៌ខ្មៅ 1AK 8939 ធ្វើដំណើរតាមបណ្តោយផ្លូវលេខ៤៦៦ ក្នុងទិសដៅពីលិចទៅកើតហើយបានជិះម៉ូតូមកស្ទាក់ពីមុខរួចទះកំភ្លៀងរូបគាត់៣ដៃ ដោយនិយាយថា ហែងមើលមុខអញធ្វើអី? ទើបបង្កការភ្ញាក់ផ្អើលឈ្លោះគ្នាតឹងសរសៃក ។

ក្រោយកើតហេតុសមត្ថកិច្ចបានចុះមកដល់ចំណុចកើតហេតុនិងសម្របសម្រួលដោយសារតែស្រវឹងរៀងខ្លួន ហើយបានឲ្យភាគីទាំងសងខាងសុំទោសគ្នាទៅវិញទៅមក និងបញ្ចប់រឿងនៅនឹងកន្លែងកើតហេតុ ៕ សុខាសែនជ័យ