សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មន្ត្រីសាលាឧទ្ធរណ៍ ថ្លែងថា សវនាការសភាស៊ើបសួរសាលាឧទ្ធរណ៍ នៅតែបន្តនៅព្រឹកថ្ងៃអង្គារ ១១កើត ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៧ ខែមីនា ឆ្នាំ២០១៨ ទោះបីជាអវត្តមានលោកកឹម សុខា អតីតប្រធាននៃអតីតគណបក្សសង្គ្រោះជាតិ ។
កម្លាំងសាធារណៈនៅតែដាក់ពង្រាយនិងមានរបាំង ដើម្បីការពារនូវសណ្តាប់ធ្នាប់សាធារណៈ ។
លោកមេធាវីសំ សុគង់ អះអាងថា កម្មវត្ថុសំខាន់នៃសវនាការនេះ គឺ ក្រុមមេធាវីប្តឹងប្រឆាំងនឹងដីកាសម្រេចពន្យារពេលឃុំខ្លួន៦ខែរបស់ចៅក្រមស៊ើបសួរសាលាដំបូងរាជធានីភ្នំពេញ ។ ក្រុមមេធាវី ថា ការសម្រេចឃុំខ្លួនលោក កឹម សុខា គឺ មិនត្រឹមត្រូវ ហើយទាមទារឱ្យមានការដោះលែង ។ ប៉ុន្ដែ យោងតាមក្រមនីតិវិធីព្រហ្មទណ្ឌ កំណត់ថា ជនណាជាប់ចោទបទឧក្រិដ្ឋ គឺ ចៅក្រមស៊ើបសួរអាចពន្យារពេលនៃការឃុំខ្លួនបាន ដោយមានសំអាងហេតុនិងមូលហេតុច្បាស់លាស់ ។
តាមដីកាអញ្ជើញលោកមេធាវីសំ សុគង់ ចូលរួមសវនាការ បង្ហាញថា សវនាការនេះនឹងធ្វើឡើងនៅវេលាម៉ោង៨ព្រឹក សាលសវនាការទី៣ លើបទចោទប្រកាន់ សន្ធិដ្ឋិភាពជាមួយបរទេស ឬ ហៅថាបទល្មើសក្បត់ជាតិ ។
គួររំលឹកថា លោក កឹម សុខា ត្រូវបានចោទប្រកាន់ពីបទ សន្ធិដ្ឋិភាពជាមួយបរទេស តាមមាត្រា ៤៤៣ នៃក្រមព្រហ្មទណ្ឌ។ បទសន្ធិដ្ឋិភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូស្តរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី ១៥ ដល់ ៣០ឆ្នាំ។
លោក កឹម សុខា ត្រូវបានសមត្ថកិច្ចចាប់ខ្លួននៅពាក់កណ្តាលអាធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧។ ក្រោយឃាត់ខ្លួន សមត្ថកិច្ចបានបញ្ជូនលោក កឹម សុខា ទៅឃុំបណ្តោះអាសន្ននៅពន្ធនាគារត្រពាំងផ្លុង ខេត្តត្បូងឃ្មុំហើយនៅថ្ងៃទី៤ ខែកញ្ញា ឆ្នាំ២០១៧ ព្រះរាជអាជ្ញា៣រូបបានទៅដល់ពន្ធនាគារត្រពាំងផ្លុង ដើម្បីសាកសួរលោក កឹម សុខាដោយការសាកសួរនោះ ក៏មានវត្តមានរបស់មេធាវីទាំង ៥រូប របស់លោក កឹម សុខា ដែរ៕ ចេស្តា
