សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ស្រវឹងជោកជាំជិះម៉ូតូឃ្លីកមួយគ្រឿងក្នុងល្បឿនលឿន មិនប្រយ័ត្នដួលខ្លួនឯងបណ្តាលឲ្យរងរបួសសន្លប់ស្តូកស្តឹង មួយសន្ទុះក៏ដឹងខ្លួនហើយត្រូវរថយន្តសង្គ្រោះដឹកទៅមន្ទីរពេទ្យភ្លាមៗ។
ហេតុការណ៍នេះ បានកើតឡើងកាលពីវេលាម៉ោង២រំលងអធ្រាត្រ ឈានចូលថ្ងៃអង្គារ ១១កើត ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៧ ខែមីនា ឆ្នាំ២០១៨ នៅចំណុចមុន្ទីពេទ្យផ្តល់ឈាម នៅតាមបណ្តោយផ្លូវលេខ២៧១ ស្ថិតក្នុងសង្កាត់ទំនប់ទឹក ខណ្ឌចការមន។
តាមសាក្សីនៅកន្លែងកើតហេតុបានឲ្យដឹថា នៅមុនពេលកើតហេតុគេបានឃើញបុរសម្នាក់ជិះម៉ូតូម៉ាកឃ្លីក មួយគ្រឿង ពណ៌សពាក់ស្លាកលេខ ភ្នំពេញ 1AC 6340 ធ្វើដំណើរតាមបណ្តោយផ្លូវលេខ២៧១ ក្នុងទិសដៅពីត្បូងទៅជើងក្នុងល្បឿនលឿនទាំងស្ថានភាពស្រវឹង ខណៈមកដល់ចំណុចកើតហេតុក៏រេចង្កូតដួលខ្លួនឯង បណ្តាលឲ្យសន្លប់ស្តូងស្តឹងភ្លាមនោះ សមត្ថកិច្ចបានចុះមកដល់ចំណុចកើតហេតុនិងទំនាក់ទំនងហៅរថយន្តសង្គ្រោះបន្ទាន់មកដឹកយកទៅសង្គ្រោះភ្លាមៗ ចំណែកម៉ូតូត្រូវបានសមត្ថកិច្ចយកទៅរក្សាទុកនៅប៉ុស្តិ៍រដ្ឋបាលនគរបាលទំនប់ទឹកដើម្បីរង់ចាំបងប្អូនជនរងគ្រោះយកឯកសារពាក់ព័ន្ធមកយកម៉ូតូទៅវិញ ៕ សុខាសែនជ័យ
