សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានរងរបួសធ្ងន់ និង២នាក់ទៀត រងរបួសស្រាល ខណៈបើកម៉ូតូប៉ះជាមួយរថយន្តបើកឆ្លងផ្លូវហេតុការណ៍នេះកើតឡើងកាលពីម៉ោងជិត២រំលងអធ្រាត្រ ឈានចូលថ្ងៃចន្ទ ៩រោច ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៩ ខែមេសា ឆ្នាំ២០១៨ ស្ថិតនៅតាមបណ្តោយផ្លូវរដ្ឋសភា សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បើករថយន្តឡិចស៊ីស RX-300 ពណ៌ទឹកមាស មួយគ្រឿង ពាក់ស្លាកលេខ ភ្នំពេញ 2R-0990 បើកចេញពីជេតកុងតឺន័រ ឆ្លងផ្លូវបត់ទៅត្បូងជិតផុតហើយស្រាប់តែមានបុរស៣នាក់ជិះម៉ូតូម៉ាកស៊ុយស៊ូគីស្មាស់វី ពាក់ស្លាកលេខ កំពង់ធំ 1F-0317 ជិះក្នុងល្បឿនលឿនរេចង្កូតទៅបុកចំ ចំហៀងខាងក្រោយខាងឆ្វេងរថយន្តបណ្តាលឲ្យរងរបួសស្រាល២នាក់ និងធ្ងន់ម្នាក់ត្រូវរថយន្តសាមុយដឹកយកទៅសង្គ្រោះបន្ទាន់ ចំណែករថយន្តរងការខូចខាតផ្នែកខាងក្រោយ។
បន្ទាប់ពីកើតហេតុសមត្ថកិច្ចបានយករថយន្ត និងម៉ូតូទៅរក្សាទុកនៅការិយាល័យចរាចរផ្លូវគោកនៃអធិការដ្ឋាននគរបាលខណ្ឌចំការមនដើម្បីរង់ចាំដោះស្រាយទៅតាមនីតិវិធី ៕ ជ្រោយពេជ្រ
