សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មុខសញ្ញាចោរប្លន់២នាក់ក្នុងចំណោមបក្ខពួក៨នាក់ ត្រូវបានកម្លាំងនគរបាលខណ្ឌសែនសុខ ស្រាវជ្រាវតាមចាប់ខ្លួនជាបន្តបន្ទាប់ ក្រោយពួកគេបានធ្វើសកម្មភាពប្រើដាវសាម៉ូរ៉ៃនិងកាំបិតផ្គាក់ កាប់ប្លន់យកម៉ូតូមួយគ្រឿងបានសម្រេច កាលពីថ្ងៃទី១០ ខែមេសា ឆ្នាំ២០១៨ វេលាម៉ោង៤ និង២០នាទីភ្លឺ នៅចំណុចមុខស្ថានីយ៍ប្រេងឥន្ទនៈតេលា ផ្លុវ២០០៤ ភូមិអូរបែកក្អម សង្កាត់អូរបែកក្អម ខណ្ឌសែនសុខ បង្កឡើងដោយជនសង្ស័យចំនួន ០៨នាក់ (គេចខ្លួន) មធ្យោបាយ ០៣គ្រឿង ។
លោក ហួរ ម៉េងវ៉ាង អធិការដ្ឋាននគរបាលខណ្ឌសែនសុខ បានឲ្យដឹងថា បន្ទាប់ពីមានករណីកាប់ប្លន់យកម៉ូតូមួយគ្រឿងពីជនរងគ្រោះបានសម្រេច ភ្លាមៗលោកបានធ្វើការស្រាវជ្រាវ រហូតនៅថ្ងៃទី១២និង១៣ ខែមេសា ឆ្នាំ២០១៨ ដោយឃាត់ខ្លួនជនសង្ស័យ២នាក់ជាបន្តបន្ទាប់ នៅចំណុចក្នុងបរិវេណមន្ទីរពេទ្យព្រះកុសមៈ សង្កាត់ទឹល្អក់១ ខណ្ឌទួលគោក ពាក់ពន្ធ័ករណីលួចមានស្ថាទម្ងន់ទោស (ដោយប្រព្រឹត្តអំពើហិង្សាប្រើដាវសាម៉ូរ៉ៃនិងកាំបិតផ្គាក់) ។
លោកអធិការខណ្ឌ បានបន្តទៀតថា ជនសង្ស័យចំនួន (០៨នាក់ ) ត្រូវបានសមត្ថកិច្ចឃាត់ខ្លួនបាន២នាក់ហើយ ទី១-ឈ្មោះ ប៊ុន សុធី ភេទប្រុស អាយុ២២ឆ្នាំ ជនជាតិខែ្មរ មុខរបរកម្មករលាងឡាន ស្នាក់នៅបន្ទប់ជួល ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ (មានសាធាតុញៀន) នៅថ្ងៃទី១២-០៤-២០១៨ តាមផ្លូវ២០០៤ ។ ទី២-ឈ្មោះ ហេម មាន ភេទប្រុស អាយុ២០ឆ្នាំ ជនជាតិខែ្មរ មុខរបរកម្មករកម្មករអនាម័យនៅមន្ទីរពេទ្យព្រះកុសមៈ ស្នាក់នៅក្នុងមន្ទីពេទ្យព្រះកុសមៈ សង្កាត់ទឹកល្អក់១ ខណ្ឌទួលគោក (គ្មានសាធាតុញៀន) នៅថ្ងៃទី១៣-០៤-២០១៨ ក្នុងមន្ទីរពេទ្យព្រះកុសមៈ ។
ចំណែកជនរងគ្រោះមានគ្នា២នាក់ រួមមមាន ៖ ទី១-ឈ្មោះ ឆៃ នាថ ភេទប្រុស អាយុ២១ឆ្នាំ ជនជាតិខ្មែរ មុខរបរបុគ្គលិកក្លឹបអាវ៉ាឡុន ស្នាក់នៅផ្ទះជួល ផ្លូវបេតុង ភូមិប៉បក្រកខាងជើង សង្កាត់កាកាប ខណ្ឌពោធិ៍សែនជ័យ (របួសចំកណ្តាលក្បាល ដាច់ស្បែកដេរចំនួន៤៨ថ្នេរ , ថ្ពាល់ខាងឆ្វេងដាច់ស្បែកដេរចំនួន ៣៥ថ្នេរ , ប្រអប់ដៃខាងស្តាំដាច់ស្បែកដេរចំនួន២២ថ្នេរ ) សរុបដេរចំនួន៩៥ថ្នេរ (សំរាកព្យាបាលនៅមន្ទីរពេទ្យសម្ភពរស្មី )។ ទី២-ឈ្មោះ ព្រឿន ប៊ុនណាល់ ភេទប្រុស អាយុ២១ឆ្នាំ ជនជាតិខ្មែរ មុខរបរបុគ្គលិកក្លឹបអាវ៉ាឡុន ស្នាក់នៅផ្ទះជួល ផ្លូវបេតុង ភូមិប៉បក្រកខាងជើង សង្កាត់កាកាប ខណ្ឌពោធិ៍សែនជ័យ (គ្មានរបួស) ។ សម្ភារៈបាត់បង់ ៖ ម៉ូតូចំនួន០១គ្រឿងម៉ាកស្កុមពី ផលិតឆ្នាំ ២០១២ ពណ៌ឈាមជ្រូក ពាក់ស្លាកលេខក្រចេះ 1B-8221 ។
គួរបញ្ជាក់ផងដែរថា នៅមុនពេលកើតហេតុ ក្រុមជនរងគ្រោះ មានគ្នា ៤នាក់ ចេញពីកន្លែងធ្វើការ នៅក្លឹបអាវ៉ាឡុន ដោយជិះម៉ូតូចំនួន២គ្រឿង ធ្វើដំណើរតាមផ្លុវ២០០៤ សង្កាត់អូរបែកក្អម ខណ្ឌសែនសុខ រួចបាននាំគ្នាចូលផឹកនៅក្លឹបផ្លេក្លឹប ភូមិត្រពាំងឈូក សង្កាត់អូរបែកក្អម ខណ្ឌសែនសុខ ។ លុះដល់ម៉ោង៤ និង៤០នាទីទៀបភ្លឺ ក្រុមជនរងគ្រោះទាំង៤នាក់ បានចេញពីក្លឹបផឹកស៊ី មកដល់ចំណុចកើតហេតុ បានជួបជាមួយក្រុមជនសង្ស័យ មានគ្នា៨នាក់ ជិះម៉ូតូចំនួន ៣គ្រឿង រួចក៍មានជំលោះប្រតាយប្រតប់គ្នា និងកាប់គ្នា រួចក្រុមជនរងគ្រោះបាននាំគ្នារត់គេចខ្លួន ក្រោយមកក្រុមជនសង្ស័យបានលើម៉ូតូរបស់ជនរងគ្រោះជិះគេចខ្លួន បន្ទាប់មកក្រុមជនរងគ្រោះបានមកកន្លែងកើតហេតុវិញ ដើម្បីយកម៉ូតូរបស់ខ្លួន ស្រាប់តែបាត់ម៉ូតូចំនួន១គ្រឿងម៉ាកស្កុមពី ផលិតឆ្នាំ ២០១២ ពណ៌ឈាមជ្រូក ពាក់ស្លាកលេខក្រចេះ 1B-8221 មិនឃើញម៉ូតូ ហើយនៅសល់តែម៉ូតូ១គ្រឿង ទើបជនរងគ្រោះមកដាក់ពាក្យបណ្តឹងនៅប៉ុស្តិ៍រដ្ឋបាលអូរបែកក្អមតែម្តង ។ លុះដល់ថ្ងៃទី១២ ខែមេសា ឆ្នាំ២០១៨ វេលាម៉ោង១ និ០៥នាទីរំលងអាធ្រាត្រ សមត្ថកិច្ចបានធ្វើការល្បាតក្នុងភូមិសាស្ត្រ បានឃើញជនសង្ស័យម្នាក់ ដែលមានភិនភាគដូចក្នុងកាមេរ៉ាសុវត្ថិភាព ពាក់ពន្ធ័ក្នុងករណីលួចមានស្ថាទម្ងន់ទោស (ដោយប្រព្រឹត្តអំពើហិង្សាប្រើដាវសាម៉ូរ៉ៃកាប់យកម៉ូតូ) កាលពីថ្ងៃទី១០ ខែមេសា ឆ្នាំ២០១៨ វេលាម៉ោង៤ និង៤០នាទីទៀបភ្លឺ នៅចំណុចមុខស្ថានីយ៍ប្រេងឥន្ទនៈតេលា ផ្លុវ២០០៤ ភូមិអូរបែកក្អម សង្កាត់អូរបែកក្អម ខណ្ឌសែនសុខ ក៏ឃាត់ខ្លួន រួចកម្លាំងសមត្ថកិច្ចបាននាំខ្លួនជនសង្ស័យខាងលើមកធ្វើការសាកសួរស្រាវជ្រាវ និងដោយមានការសហការពីកម្លាំងការិល័យនគរបាលព្រហ្មទណ្ឌកំរិតធ្ងន់នៃស្នងការដ្ឋានគរបាលរាជធានីភ្នំពេញ ។ហើយជនសង្ស័យខាងលើបានសារភាពថាខ្លួនពិតជាបានធ្វើសកម្មភាពក្នុងករណីខាងលើពិតប្រាកដមែន ។ លុះដល់ថ្ងៃទី១៣ ខែមេសា ឆ្នាំ២០១៨ វេលាម៉ោង១រសៀល អធិការដ្ឋាននគរបាលខណ្ឌសែនសុខ បានបន្តឃាត់ខ្លួនជនសង្ស័យឈ្មោះ ហេម មាន នៅក្នុងមន្ទីរពេទ្យព្រះកុសមៈយកមកធ្វើការសាកសួរអធិការដ្ឋាននគរបាលខណ្ឌសែនសុខ ។
បច្ចុប្បន្នទាំង២នាក់ ត្រូវបានឃាត់ខ្លួនបណ្ឌោះអាសន្ននៅអធិការដ្ឋាននគរបាលខណ្ឌសែនសុខ និងបញ្ជូនទៅសាលាដំបូងរាជធានីភ្នំពេញ ដើម្បីអនុវត្តតាមនិតិវិធី ។ ចំណែកបក្ខពួកចំនួន៦នាក់ទៀតដែលនៅសេសសល់ សមត្ថ្ចកិច្ចកំពុងធ្វើការស្រាវជ្រាវបន្តតាមចាប់ខ្លួនយកមកដាក់ទោសតាមច្បាប់ ៕ស តារា
