សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ បានបើករថយន្តហាយឡែនឌ័រក្នុងស្ថានភាពស្រវឹង ហើយបោះពួយយ៉ាងលឿនបានរេចង្កូតទៅបុកក្បាលនាគពុះចែកទ្រូងផ្លូវពេញទំហឹង បណ្ដាលរបាំងថ្មបាក់វៀចមួយកង់ ឯរថយន្តបង្កបានព្យាយាមបើករត់រហូតមកដល់ចំណុចផ្លូវលេខ២៨៨ ក៏ទៅមុខលែងរួច។
គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង២ និង២០នាទីរំលងអធ្រាត្រ ឈានចូល ថ្ងៃអង្គារ ១០កើត ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២៤ ខែមេសា ឆ្នាំ២០១៨ ស្ថិតនៅតាមបណ្ដោយផ្លូវព្រះសីហនុ កែងផ្លូវលេខ១៤៣ ក្នុងសង្កាត់បឹងកេងកង២ ខណ្ឌចំការមន រាជធានីភ្នំពេញ ។
យោងតាមប្រភពពីកន្លែងកើតហេតុបានឲ្យដឹងថា រថយន្តហាយឡែនឌ័រពណ័ស្ករ មិនមានស្លាកលេខ បានធ្វើដំណើរតាមបណ្ដោយផ្លូវព្រះសីហនុ ទិសដៅពីលិចទៅកើត ក្នុងល្បឿនលឿន ខណៈមកដល់ចំណុចកើតហេតុខាងលើ ក៏បានរេចង្កូតទៅបុកក្បាលនាគពុះចែកទ្រូងផ្លូវពេញទំហឹង បណ្ដាលឲ្យក្បាលនាគបាក់វៀចមួយកង់ ចំណែកឯរថយន្តបង្កមិនព្រមឈប់ទទួលខុសត្រូវទេ ដោយបានព្យាយាមបើករថយន្តទាំងខ្ទេចផ្នែកខាងមុខ រហូតទៅដល់មុខហាងអាហាដ្ឋាន គ្រឿងសមុទ្រBBQ នៅផ្លូវលេខ២៨៨ ក្នុងសង្កាត់អូឡាំពេជ ខណ្ឌចំការមន ទើបទៅមុខលែងរួច។
ក្រោយកើតហេតុ សមត្ថកិច្ចមូលដ្ឋានបានទាក់ទងទៅជំនាញចរាចរណ៍ខណ្ឌ ឲ្យចុះមកវាស់វែងយករថយន្តបង្ករទៅកាន់ការិយាល័យចរាចរណ៍ជើងគោក នៃស្នងការដ្ឋានរាជធានីភ្នំពេញ រង់ចាំដោះស្រាយតាមផ្លូវច្បាប់៕ ភារ៉ា ដង្កោ
