បុរស៣នាក់បានរងរបួសធ្ងន់ស្រាលដោយសារបើកម៉ូតូទៅបុករថយន្តក្នុងទិសដៅបញ្ច្រាសគ្នា

ភ្នំពេញ៖ បុរស៣នាក់បានរងរបួសធ្ងន់ស្រាលត្រូវរថយន្តសាមុយដឹកយកទៅសង្គ្រោះនៅឯមន្ទីរពេទ្យដោយសារបើកម៉ូតូមួយគ្រឿងក្នុងល្បឿនលឿនពេក ក៏រ៉េចង្កូតទៅបុករថយន្តដែលធ្វើដំណើរបញ្ច្រាសទិសគ្នា ។

ហេតុការណ៍នេះកើតឡើងការពីម៉ោង៣និង៣០នាទីទៀបភ្លឺ ថ្ងៃសុក្រ ៥រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៤ ខែឧសភា ឆ្នាំ២០១៨ ស្ថិតតាមបណ្តោយផ្លូវជាតិលេខ២ ច្រកផ្លូវលំ(ផ្សារក្រមួន) សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់ រួមដំណើរជាមួយនារីម្នាក់ បានបើករថយន្តម៉ាកតូយូតាព្រូស ពណ៌ទឹកមាស ពាក់ស្លាកលេខ ភ្នំពេញ 2AP-4442 បើកតាមបណ្តោយផ្លូវលំ ក្នុងទិសដៅពីលិចទៅកើត ស្រាប់តែមានបុរស៣នាក់ បើកម៉ូតូឌុបគ្នាម៉ាកឌ្រីមសង់ប៊ិច ពណ៌ខៀវ ពាក់ស្លាកលេខ ភ្នំពេញ 1O-9410 ក្នុងល្បឿនលឿនក៏រ៉េចង្កូតមកបុកចំបញ្ឈិតរថយន្តបណ្តាលឲ្យអ្នកបើកបរម៉ូតូរងរបួសធ្ងន់ស្រាល៣នាក់ ត្រូវរថយន្តសាមុយដឹកយកទៅសង្គ្រោះនៅគ្លីនិកឯកជន ចំណែករថយន្តរងការខូចខាតផ្នែកខាងស្តាំ។

ក្រោយពេលកើតហេតុសមត្ថកិច្ចជំនាញបានឲ្យរថយន្តស្ទូចយករថយន្តនិងម៉ូតូយកទៅរក្សាទុកនៅអធិការដ្ឋាននគរបាលខណ្ឌមានជ័យដើម្បីរង់ចាំដោះស្រាយទៅតាមនិតិវិធី ៕ ជ្រោយពេជ្រ