សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ប្រជាពលរដ្ឋបានរិះគន់ខ្លាំងៗទៅលើទីតាំងស្តង់អេតចាយមួយកន្លែងថាបាននិងកំពុងរំលោភយកផ្លូវសាធារណៈចតរថយន្ត និងដាក់ឥវ៉ាន់បែបអនាធិបតេយ្យបង្ករឲ្យប៉ះពាល់យ៉ាងធ្ងន់ធ្ងរទៅដល់សណ្តាប់ធ្នាប់សាធារណៈ និងអ្នកធ្វើដំណើរផងដែរ។
ប្រជាពលរដ្ឋបានលើកថា ស្តង់អេតចាយខាងលើមានទីតាំងនៅតាមបណ្តោយផ្លូវជាតិលេខ៥៧B ចំណុចខាងលិចអធិការនគរបាលស្រុករតនៈមណ្ឌល ស្ថិតក្នុងភូមិស្តៅ ឃុំស្តៅ ស្រុករតនះមណ្ឌល ដោយទីតាំងខាងលើនេះបានរំលោភយកចិញ្ចើមផ្លូវសាធារណៈ ធ្វើជាចំណតរថយន្ត និងដាក់ឥវ៉ាន់ ពាសវាលពាសកាល បែបអនាធិបតេយ្យ បង្ករឲ្យប៉ះពាល់យ៉ាងធ្ងន់ធ្ងរទៅដល់សណ្តាប់ធ្នាប់ទីសាធារណៈ និងភាពភ័យខ្លាចដល់អ្នកធ្វើដំណើរនៅតាមដងផ្លូវនោះផងដែរ ។
ពាក់ព័ន្ធទៅនឹងបញ្ហាលើកឡើងខាងលើ លោក សន និល អធិការនគរបាលស្រុករតនះមណ្ឌលបានប្រាប់ឲ្យដឹងកាលពីព្រឹកថ្ងៃសុក្រ ១១កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៥ ខែឧសភា ឆ្នាំ២០១៨ថា ទីតាំងស្តង់អេតចាយខាងលើវាពិតជាបានដាក់ឥវ៉ាន់ និងចតរថយន្តរំលោភនៅលើចិញ្ចើមផ្លូវមែន ហើយរយះពេលកន្លងមកលោកបានចាត់ឲ្យអធិការរងទទួលបន្ទុកផ្នែកសណ្តាប់ធ្នាប់ ចុះទៅធ្វើការនែរនាំដល់ម្ចាស់ទីតាំងខាងលើច្រើនលើកច្រើនសាមកហើយ ប៉ុន្តែខាងគេមិនគោរព និងអនុវត្តតាមការនែរនាំរបស់សមត្ថកិច្ចទាល់តែសោះ។
លោកបន្តថា ទីតាំងមួយនេះមិនត្រឹមតែចតរថយន្ត និងដាក់ឥវ៉ាន់រំលោភនៅលើចិញ្ចើមផ្លូវសាធារណៈប៉ុណ្ណោះទេ ថែមទាំងបានចាក់ទឹកអាសុីត អាគុយនៅលើដងផ្លូវធ្វើឲ្យជះក្លិនមិនល្អប៉ះពាល់ទៅដល់ផ្លូវដង្ហើមរបស់បងប្អូនប្រជាពលរដ្ឋដែលធ្វើដំណើរឆ្លងកាត់ទីនោះផងដែរ ហើយបើសិនជាទីតាំងខាងលើនេះកើតមានឧបទ្ទវហេតុ ឬករណីគ្រោះថ្នាក់ចរាចរណ៍អ្វីចៃដន្យណាមួយកើតឡើងនៅចំណុចនោះ ខាងលោកនឹងដាក់បន្ទុកពីលើបន្ថែមឲ្យម្ចាស់ទីតាំងខាងលើទទួលរ៉ាប់រងខុសត្រូវទាំងអស់ ៕ ប៊ុនថេត
