ឡានឡិចស៊ីសមួយគ្រឿងត្រូវសមត្ថកិច្ចដកហូតពីយានដ្ឋាននាគទិព្ធ ក្រុងប៉ោយប៉ែត

ប៉ោយប៉ែត៖ នៅថ្ងៃពុធ ១រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣០ ខែឧសភា ឆ្នាំ២០១៨ វេលាម៉ោង ២០ និង ៣០នាទី លើផ្លូវលំក្រាលបេតុង ក្នុងបរិវេណកាស៊ីណូ ត្រង់ចំណុចខាងមុខកាស៊ីណូផ្កាយប្រាំ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មានរថយន្តឡិចស៊ីស RX300 ផលិតឆ្នាំ២០០១ ពាក់ស្លាកលេខ ភ្នំពេញ 2AN-9395 បើកបរដោយឈ្មោះ ជាម សំអូន ភេទប្រុស អាយុ២៧ឆ្នាំ ស្នាក់នៅផ្ទះជួលស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បើកបរពីជើងទៅត្បូង លុះដល់ចំណុចកើតហេតុ បានបើកឡើងជែងរថយន្តនៅពីមុខ លុះជែងបានបន្តិចស្រាប់តែបុក និងម៉ូតូ ០១គ្រឿង ម៉ាកហុងដាទ្រីមសេ១២៥ ពណ៏ខ្មៅ ពាក់ស្លាកលេខ បន្ទាយមានជ័យ 1F-5856 បើកបរដោយឈ្មោះ ឃី ឃាង ភេទប្រុស អាយុ៣៧ឆ្នាំ មុខរបរ សន្តិសុខកាស៊ីណូ រស់នៅក្នុងភូមិទំនប់ក៥ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បើកបរពីត្បូងទៅជើង (ច្រាសទិសគ្នា)គ្រោះថ្នាក់តែម្តង ។

សមត្ថកិច្ចបញ្ជាក់ថា ហេតុការណ៍ខាងលើនេះបានបណ្តាលឲ្យ ឈ្មោះ ឃី ឃាង រងរបួសលើជើង ។

ម៉ូតូដែលខូចខាត ត្រូវបានយកទៅរក្សាទុកនៅអធិការដ្ឋាន ។ រីឯរថយន្ត បើករត់គេចបាត់ ក្រោយមកនៅព្រឹកថ្ងៃព្រហស្បតិ៍ ២រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣១ ខែឧសភា ឆ្នាំ២០១៨ រថយន្តខាងលើត្រូវបានសមត្ថកិច្ចរកឃើញ និងដកហូតពីយានដ្ឋានជួសជុលនៅខាងជើងនាគទិព្ធយកមករក្សាទុកនៅអធិការដ្ឋាន ដើម្បីដោះស្រាយបន្ត ៕ វណ្ណា