សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនម្នាក់ជិះម៉ូតូបញ្ច្រាសទិសដៅចរាចរណ៍ឆ្លងមកខាងស្តាំដៃវិញ ក៏ជ្រុលបុកម៉ូតូមួយគ្រឿងទៀតដែលជិះបញ្ច្រាសទិសដៅចរាចរណ៍ដូចគ្នាបណ្តាលឲ្យរងរបួសធ្ងន់ម្នាក់ ។
ហេតុការណ៍នេះបានកើតឡើងកាលពីវេលាម៉ោង១០និង២០នាទីយប់ថ្ងៃទី៣១ ខែឧសភាឆ្នាំ២០១៨ នៅចំណុចមុខស្ថានីយ៍ប្រេងឥន្ទះPtt តាមបណ្តោយផ្លូវលេខ២៧១ ស្ថិតក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញយុវជនម្នាក់ជិះម៉ូតូម៉ាក់ហុងដាសង់ស៊េរីឆ្នាំ២០១២ ពណ៌ខ្មៅ ពាក់ស្លាកលេខភ្នំពេញ1AC 6000 ធ្វើដំណើរតាមបណ្តោយផ្លូវលេខ២៧១ ក្នុងទិសដៅពីត្បូងទៅជើងទាំងបញ្ច្រាសទិសដៅចរាចរណ៍ហើយបានជិះឆ្លងផ្លូវមកខាងស្តាំវិញស្រាប់មានម៉ូតូម៉ាកហុងដាស៊េរីឆ្នាំ២០១៨ ពណ៌ខ្មៅ ពាក់ស្លាកលេខភ្នំពេញ1GS8367 ក្នុងទិសដៅពីជើងទៅត្បូង ទាំងបញ្ច្រាសទិសដៅចរាចរណ៍ដូចគ្នាហើយបានបុកគ្នាពេញទំហឹងបណ្តាលឲ្យអ្នកជិះម៉ូតូស៊េរីឆ្នាំ២០១២រងរបួសធ្ងន់ចំណែកភាគខាងម៉ូតូ២០១៨ រងរបួសស្រាល ។
ក្រោយពេលកើតហេតុជនរងគ្រោះដែលរបួសធ្ងន់ត្រូវបានបញ្ជូនទៅមន្ទីរពេទ្យភ្លាមៗ ចំណែកម៉ូតូត្រូវបានសមត្ថកិច្ចវាស់វែងយកទៅរក្សាទុកនៅអធិការដ្ឋាននគរបាលខណ្ឌចំការមនរង់ចាំដោះស្រាយបន្ត៕សុខាសែនជ័យ
