រថយន្តសាំងយ៉ុងបើកបុកបុរសចំណាស់ពេញទំហឹងបណ្តាយឲ្យស្លាប់ភ្លាមៗនៅកន្លែងកើតហេតុ

ខេត្តកំពង់ធំ៖ បុរសចំណាស់ម្នាក់ជិះម៉ូតូឡើងជែងរថយន្តពេទ្យមិនផុត ត្រូវរថយន្តសាំងយ៉ុងមកពីមុខពេញទំហឹងអូសប្រមាណ៧០ទៅ៨០ម៉ែត្រ បណ្តាលឲ្យដួលបោកក្បាល ស្លាប់ភ្លាមៗនៅនឹងកន្លែងកើត ។

ហេតុការណ៍ដ៏រន្ធត់នេះបានកើតឡើង កាលពីរសៀលម៉ោង២រសៀល ថ្ងៃព្រហស្បតិ៍ ២រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣១ ខែឧសភា ឆ្នាំ២០១៨ នៅតាមបណ្តោយផ្លូវជាតិលេខ០៦ ស្ថិតនៅភូមិព្រៃភ្លូ ឃុំកំពង់ថ្ម ស្រុកសន្ទុក ខេត្តកំពង់ធំ ។

លោកស៊ី វណ្ណា អធិការរងចរាចរណ៍ស្រុកសន្ទុកបានឲ្យដឹងថា ជនរងគ្រោះឈ្មោះ ឯក យ៉ិន ភេទប្រុស អាយុ៥៧ឆ្នាំ(ស្លាប់នៅកន្លែងកើតហេតុ) ទីលំនៅភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ បាន ជិះម៉ូតូម៉ាក វីជែង ពណ៏ខ្មៅ ស្លាកលេខ កំពង់ធំ1A.1461ចេញពីកើត ទៅលិច ឯអ្នកបើករថយន្តសាំងយ៉ុង ពណ៌ សរ ស្លាកលេខ 2Y.3062 ចេញពីលិចទៅកើតក្នុងទិសដៅបញ្ច្រាសគ្នា ក្រោយកើតហេតុ តៃកុងរថយន្តចុះរត់គេចខ្លួនបាត់ស្រមោល ។

ក្រោយកើតហេតុសមត្ថកិច្ចចុះវាស់វែងធ្វើកំណត់ហេតុ រួច ប្រគល់សាកសពជនរងគ្រោះឲ្យសាច់ញាតិក្រុមគ្រួសារយកទៅធ្វើបុណ្យទោតាមប្រពៃណី និងប្រមូលវត្ថុតាង រថយន្ត និងម៉ូតូយកទៅរក្សារទុកនៅអធិការនគរបាលស្រុក ព្រមទាំងបើកការស្រាវជ្រាវ ចាប់ខ្លួនជនបង្កអោយចូលខ្លួនមកដោះស្រាយគ្នាតាមនីតិវិធី៕ ប៊ុនរិទ្ធី