សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ បន្ទាប់ពីស្ថាប័នព័ត៌មាន ក៏ដូចជាបណ្ដាញសង្គមហ្វេសប៊ុក ចុះផ្សាយជាបន្តបន្ទាប់ ពីភាពអសកម្មរបស់ខ្លួន ក្នុងការទប់ស្កាត់បទល្មើសនានា ត្រូវបានអាជ្ញាធរខេត្តកំពង់ធំ ផ្ទុះកម្ដៅជាមួយសារព័ត៌មាន ហើយបានដាក់កំហិត ឲ្យអ្នកសារព័ត៌មានទាំងអស់ ដាច់ខាត ត្រូវតែចុះបញ្ជី នៅមន្ទីរព័ត៌មានខេត្តកំពង់ធំ។
អាជ្ញាធរខេត្តកំពង់ធំ ផ្ទុះកំហឹងយ៉ាងដូច្នេះ បន្ទាប់ពីស្ថាប័នព័ត៌មាន ជាច្រើន បានចុះផ្សាយជាបន្ដបន្ទាប់ពីក្រុម ឈ្មួញជាច្រើនធ្វើសកម្មភាព សម្រុកកាប់ឈើ ក្នុងតំបន់ព្រៃឡង់ ស្រុកសណ្ដាន់ និងតំបន់ព្រៃអង់តែន ក្នុងស្រុកសន្ទុក ខេត្តកំពង់ធំហើយ ដឹកជញ្ជូនឈើចេញ យ៉ាងគគ្រឹកគគ្រេង ហើយមិនឃើញអាជ្ញាធរ និងជំនាញរបស់លោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំ ចាត់វិធានការបង្ក្រាប តាមតួនាទីរបស់ខ្លួននោះទេ ? វាផ្ទុះស្រលះពីបទបញ្ជារបស់សម្ដេចតេជោ ហ៊ុន សែននាយករដ្ឋមន្ដ្រី ។
យើងក្រឡេកមើល បទល្មើសនេសាទប្រើឧបករណ៍ខុសច្បាប់ ក៏កំពុងកើតមានយ៉ាងអនាធិបតេយ្យនៅលើផ្ទៃបឹងទន្លេសាប ក្នុងឃុំពាមបាង ឃុំសំព្រោជ ឃុំម្សាក្រង និងឃុំចំណារក្រោម ស្រុកស្ទោង ខេត្តកំពង់ធំ ។ ប្រជាពលរដ្ឋ បានលើកឡើងថា ធនធានមច្ឆជាតិក្នុងមូលដ្ឋានពួកគាត់កំពុងប្រឈមនឹងសេចក្ដីវិនាសចៀសមិនផុតឡើយ ព្រោះមន្ត្រីអាជ្ញាធរឃុំ អាជ្ញាធរស្រុក ក៏ដូចជាមន្ត្រីរដ្ឋបាលជលផល និងសមត្ថកិច្ចពាក់ព័ន្ធ មិនចាត់វិធានការបង្ក្រាបបទល្មើសតាមតួនាទីរបស់ខ្លួននោះទេ។
ដោយឡែកបញ្ហា រុករានដីព្រៃរបស់រដ្ឋពីក្រុមឈ្មួញក៏កើតឡើងយ៉ាង ពេញបន្ទុក នៅឃុំពពក ស្រុកស្ទោង និងភូមិសំអោង ឃុំមានរិទ្ធ ស្រុកសណ្ដាន់ ខេត្តកំពង់ធំ ហើយ មន្ត្រីអាជ្ញាធរ ស្រុកស្ទោង និងស្រុកសណ្ដាន់ ក៏ដូចជា មន្ត្រីអាជ្ញាធរខេត្តកំពង់ធំ មិនចាត់វិធានការបង្ក្រាបឡើយ។
បទល្មើសព្រៃឈើ ក៏ដូចជាបទល្មើសនេសាទ គឺគេអាចមើលដោយភ្នែកទទេឃើញ ដូច្នេះទាំងអាជ្ញាធរ ដែលមានសមត្ថកិច្ច និងថ្នាក់ដឹកនាំខេត្ត ក៏ដូចជាអ្នកកាសែតអាចចុះទៅដល់ទីតាំងដែលមានបទល្មើស ដើម្បីឲ្យប្រាកដថា តើសេចក្តីរាយការណ៍របស់អ្នកកាសែតពិតដែរឬទេ ។ ការដែលអាជ្ញាធរឆ្លើយបដិសេធន៍ថា គ្មានបទល្មើស គឺមិនគ្រប់គ្រាន់នោះឡើយ ។ ផ្ទុយទៅវិញ ការចុះដល់ទីកន្លែងកើតហេតុ ឬទីតាំងបទល្មើស ទើបជាភាពជាក់ស្តែង ។ មិនតែប៉ុណ្ណោះ នៅពេលដែលទទួលបានសេចក្តីរាយការណ៍ពីអ្នកសារព័ត៌មាន ឬក្រោយសារព័ត៌មានចុះផ្សាយ អាជ្ញាធរ ក៏ដូចជាស្ថាប័នជំនាញត្រូវចុះដល់ទីតាំង មិនមែនជឿតាមរបាយការណ៍ឆ្លើយតាមទូរស័ព្ទរបស់សមត្ថកិច្ចជំនាញទាំងនោះទេ ។
ថ្លែងក្នុងពិធីជួបជុំអ្នកសារព័ត៌មានក្នុងខេត្តកំពង់ធំ នៅថ្ងៃពុធ ១រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣០ ខែឧសភា ឆ្នាំ២០១៨ លោក សុក ហៃ អភិបាលរងខេត្ត និងជាអ្នកនាំពាក្យសាលាខេត្តកំពង់ធំ ថ្លែងថា ក្នុងនាមជាអ្នកសារព័ត៌មាន ដែលមានក្រមសីលធម៌ វិជ្ជាជីវៈ និងជាកញ្ចក់ឆ្លុះបញ្ចាំង អំពីសកម្មភាពគ្រប់រូបភាព លើមនុស្សគ្រប់ស្រទាប់វណ្ណៈ ដាច់ខាត ត្រូវតែជាកញ្ចក់ ឆ្លុះមួយដែល ស ស្អាត ថ្លា និងស្មើរ គ្រប់ពេលវេលា។
លោកអភិបាលរង បន្តថា ដើម្បីឲ្យកញ្ចក់នេះកាន់តែមានប្រសិទ្ធិភាព ទៅបាន អ្នកសារព័ត៌ដែលបានមកប្រកបមុខរបរវិជ្ជាជីវៈក្នុងខេត្តកំពង់ធំទាំងអស់ដាច់ខាត ត្រូវតែមកចុះបញ្ជី នៅមន្ទីរព័ត៌មានខេត្តកំពង់ធំ។ ការចុះបញ្ជីនេះ មិនមែនជាការគំរាម កំហែង ចំពោះសិទ្ធិចុះផ្សាយ សរសេរ និងរារាំង អ្នកសារព័ត៌រូបណាម្នាក់ ក្នុងការចុះផ្សាយនោះទេ តែបែរទៅវិញ វាជាការផ្តល់នូវភាពងាយស្រួលក្នុងការទាក់ទងគ្នា ទៅវិញទៅមក ជាពិសេសនោះ បានផ្តល់ភាពងាយស្រួលក្នុងការទាក់ទងគ្នា ក្នុងការផ្តល់ព័ត៌មាន ព្រមទាំងការស្រាយបំភ្លឺរបស់ អង្គភាពមន្ទីរជំនាញ ទៅកាន់បងប្អូនអ្នកសារព័ត៌មាន ឲ្យកាន់តែច្បាស់លាស់ ជៀសវាងការចុះផ្សាយខុស ដែលធ្វើឲ្យខូចកិត្តិយស របស់ថ្នាក់ដឹកនាំ ឬមន្ទីរអង្គភាពជំនាញ ធ្វើឲ្យមហាជនយល់ច្រឡំ ហើយនិយាយថាចាំផ្សាយបកស្រាយទៅវិញ។
លោក មាស សុភ័ណ្ឌ អនុរដ្ឋលេខាធិការក្រសួងព័ត៌មាន ធ្លាប់បានលើកឡើងថា ច្បាប់របបសារព័ត៌មាន បានបើកសិទ្ធទូលំទូលាយ ឲ្យអ្នកសារព័ត៌មាន ក្នុងការផ្សព្វផ្សាយព័ត៌មាននានា ដោយគ្មានហាមឃាត់នោះទេ ។ លោក មាស សុភ័ណ្ឌ បញ្ជាក់ថា ក្នុងច្បាប់របបសារព័ត៌មានសំដៅទៅលើ អាទិភាពអ្នកសារព័ត៌មាន ប៉ុន្តែច្បាប់របបសិទ្ធទទួលបានព័ត៌មាន ក៏បានបើកសិទ្ធទូលំទូលាយទៅឲ្យសាធារណជនទូទៅ អាចទទួលបានព័ត៌មាន ពីស្ថាប័នសាធារណៈ។ លោក បានបន្ថែមទៀត ថា “នៅក្នុងច្បាប់របបសារព័ត៌មាន គឺបើកសិទ្ធិទូលំទូលាយ ទៅឲ្យអ្នកសារព័ត៌មាន ស្តីពីការផ្សាយព័ត៌មាន”។
សូមបញ្ជាក់ថា សេចក្ដីព្រាងច្បាប់សារព័ត៌មាន មាន៨ ជំពូកដូចជា ៖ ជំពូក១–បទបញ្ញត្តិ ទូទៅ , ២– សិទ្ធិនិងកាតព្វកិច្ចនៃការផ្ដល់ព័ត៌មាន , ៣– នីតិវិធីស្នើសុំ និងផ្ដល់ព័ត៌មាន , ៤– ព័ត៌មាន សម្ងាត់ , ៥– កិច្ចការពារអ្នកផ្ដល់ព័ត៌មាន , ៦– ការប្ដឹងតវ៉ា និងការអនុវត្តសេចក្ដីសម្រេច , ៧– ទោសបញ្ញត្តិ និងទី៨ អន្តរបញ្ញត្តិ ។
អាជ្ញាធរខេត្តកំពង់ធំ អាចសហការជាមួយអ្នកសារព័ត៌មានដើម្បីបញ្ជាក់ទៅលើព័ត៌មាននីមួយៗថា វាពិតកម្រិតណា ។ ពិតហើយសមត្ថកិច្ចជំនាញដូចជារដ្ឋបាលព្រៃឈើ និងរដ្ឋបាលជលផល នៅតែជាអ្នកដែលមានប្រៀបលើអ្នកកាសែត ប្រសិនបើគេចង់ឈ្នះ ។ ឧទាហរណ៍ថា បើត្រូវចុះទៅពិនិត្យបទល្មើសនេសាទ មន្ត្រីរដ្ឋបាលជលផលអាចទាក់ទងខ្សែបណ្តោយរបស់ខ្លួនថ្នាក់ក្រោមឲ្យឈ្មួញផ្អាកសកម្មភាពនេសាទល្មើស នៅពេលដែលដឹងថា មានគេចុះពិនិត្យយ៉ាងដូច្នេះ ។ រីឯរដ្ឋបាលព្រៃឈើក៏យ៉ាងដូច្នោះដែរ ។
និយាយរួមទៅដើម្បីភាពត្រឹមត្រូវរៀងខ្លួន ប្រសិនបើអាជ្ញាធរជាមាសសុទ្ធ មិនគួរខ្លាចភ្លើងនោះទេ ។ ផ្ទុយទៅវិញ នៅពេលដែលមានសេចក្តីរាយការណ៍ អំពីចំណុចអសកម្ម គួរតែដឹកនាំកម្លាំងចុះមើល ពីព្រោះបទល្មើសព្រៃឈើ ឬបទល្មើសនេសាទមិនដូចបទល្មើសគ្រឿងញៀនទេ ។ ការចុះអង្កេតបែបនេះ មិនមែនដឹកនាំដោយប្រតិភូនោះឡើយ ។ ការជូនដំណឹងអំពីការចុះត្រួតពិនិត្យបទល្មើស ស្មើនឹងការជូនដំណឹងឲ្យជនប្រព្រឹត្តល្មើសផ្អាកសកម្មភាព ៕ ហេង សូរិយា
