សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្លាំងនគរបាលបានបើកប្រតិបត្តិការចុះបង្ក្រាបអ្នកញៀនល្បែងសុីសងជាជនជាតិចិនប្រុសស្រីចំនួន១៤នាក់ ខណៈកំពុងប្រមូលផ្តុំគ្នាលេងល្បែងស៊ីសង (បៀចិនម៉ាជាំង) ។
ប្រតិបត្តិការណ៍នេះបានធ្វើឡើងកាលពីម៉ោង១០និង៥០នាទីយប់ថ្ងៃសៅរ៍ ៤រោច ខែជេស្ឋ ឆ្នាំច សំរឹទ្ធិស័ក្តិ ព.ស. ២៥៦២ ត្រូវនឹងថ្ងៃទី២ ខែមិថុនា ឆ្នាំ២០១៨ នៅក្នុងបុរីមួយកន្លែង ភូមិព្រៃទា១ សង្កាត់ចោមចៅ៣ ខណ្ឌពោធិ៍សែនជ័យ។
សមត្ថកិច្ចបានឲ្យដឹងថា មុនឈានទៅឃាត់ក្រុមលេងល្បែងស៊ីសងខាងលើ ក្រោយពីមានប្រជាពលរដ្ឋរាយការណ៍ពីទីតាំងខាងលើបើកលេងល្បែងស៊ីសងខុសច្បាប់ ទើបនគរបាលខណ្ឌក្រោមការបញ្ជាផ្ទាល់ពីលោកវរៈសេនីយ៍ឯក យឹម សារ៉ាន់ អធិការខណ្ឌ និងដោយមានការសម្របសម្រួលពីលោកព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ទើបកម្លាំងនគរបាលខណ្ឌចុះទៅបង្ក្រាបដល់ទីតាំងខាងលើ និងឃាត់ខ្លួនបានជាក់ស្តែងអ្នកលេងល្បែងស៊ីសងប្រុសចំនួន១០នាក់ និងស្រីចំនួន៤នាក់ ព្រមទាំងដកហូតបានតុសម្រាប់លេង៤ឈុត គ្រាប់ម៉ាជាំងមួយចំនួន ដោយឡែកលុយវិញសមត្ថកិច្ចមិនបានដកហូតទេគឺឲ្យក្រុមអ្នកលេងល្បែងខាងលើរក្សាទុករៀងៗខ្លួន ។
សមត្ថកិច្ចបានបញ្ជាក់ថា ករណីខាងលើសមត្ថកិច្ចមិនទាន់បានសាកសួរចេញនៅឡើយ ព្រោះថាអាចជាប់ពាក់ព័ន្ធប៉ុន្មានអ្នកទៀត ដោយរង់ចាំមានអ្នកបកប្រែសិន។
បច្ចុប្បន្ន ជនជាតិចិនប្រុសស្រីទាំង១៤នាក់ខាងលើកំពុងឃាត់ខ្លួនបណ្តោះអាសន្ននៅកន្លែងផ្នែកជំនាញនៃអធិការដ្ឋាននគរបាលខណ្ឌពោធិ៍សែនជ័យរង់ចាំសាកសួរពេលក្រោយ ៕ សុខាសែនជ័យ
