សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ជនជាតិឥណ្ឌូនេស៊ីម្នាក់ត្រូវបានកម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះសីហនុ ឃាត់ខ្លួនពាក់ព័ន្ធករណីរំលោភលើទំនុកចិត្ត (លួចលុយរបស់ក្រុមហ៊ុនតាមប្រព័ន្ធអនឡាញ )។ ជនសង្ស័យត្រូវបានកម្លាំងនគរបាលឃាត់ខ្លួនកាលពីថ្ងៃអាទិត្យ ៥រោច ខែជេស្ឋ ឆ្នាំច សំរឹទ្ធិស័ក្តិ ព.ស. ២៥៦២ ត្រូវនឹងថ្ងៃទី៣ ខែមិថុនា ឆ្នាំ២០១៨ វេលាម៉ោង១៦និង២០នាទី។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានឲ្យដឹងថា ជនរងគ្រោះឈ្មោះ LAV HAN NUNG ភេទប្រុស អាយុ ៤៣ឆ្នាំ សញ្ជាតិឥណ្ឌូនេស៊ី មុខរបរអ្នក តំណាងឲ្យក្រុមហ៊ុនកាស៊ីណូ ឌឹរីច មានទីលំនៅភូមិ៣ សង្កាត់៣ ក្រុង-ខេត្តព្រះសីហនុ។ ចំណែកជនសង្ស័យឈ្មោះ WILLIAM WIJAYA ភេទប្រុស អាយុ ២៣ឆ្នាំ សញ្ជាតិ ឥណ្ឌូនេស៊ី មុខរបរបុគ្គលិកក្រុមហ៊ុនកាស៊ីណូ ឌឹរីច ស្នាក់នៅភូមិ៣ សង្កាត់៣ ក្រុង-ខេត្តព្រះសីហនុ។
លោកឧត្តមសេនីយ៍ទោស្នងការបន្តថា ជនសង្ស័យបានធ្វើសកម្មភាព រំលោភលើទំនុកចិត្ត (លួចលុយរបស់ក្រុមហ៊ុនតាមប្រព័ន្ធអនឡាញ ) ចាប់តាំងពីថ្ងៃទី២១ ខែឧសភា ឆ្នាំ២០១៨ រហូតដល់ថ្ងៃទី០២ ខែមិថុនា ឆ្នាំ២០១៨ ដែលសរុបជាទឹកប្រាក់ចំនួន១១,៩៤៧ដុល្លារ។ បច្ចុប្បន្នជនសង្ស័យខាងលើនេះកម្លាំងជំនាញកំពុងសាកសួរយកចម្លើយ និងកសាងសំណុំរឿងដើម្បីចាត់ការតាមនីតិវិធី ៕ ឆ្លាម សមុទ្រ
