សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ ៖ រថយន្ដទំនើប LEXUS 470 ដឹកទ្វារ និងឈើប្រណីតខុសច្បាប់ ពេញប្រៀប បើកលឿនបែកកង់ក្រោយ ក្រឡាប់ចូលស្រែ នាកន្លងទៅថ្មីៗនេះ ត្រូវបានរដ្ឋបាលព្រៃឈើ ខេត្តឧត្តរមានជ័យ ដោះលែងដោយស្ងាត់ៗ ។
សូមរំលឹកថា កាលពីថ្ងៃទី៩ ខែមិថុនា ឆ្នាំ ២០១៨ មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើង គឺរថយន្ដទំនើប LEXUS 470 ពាក់សា្លកលេខ ភ្នំពេញ2N 6975 ដឹកទ្វារបង្អួច និងឈើប្រណីតពេញប្រៀប បានបែកកង់ក្រោយក្រឡាប់ចូលស្រែ ស្ថិតនៅចំណុចឃុំពង្រ ស្រុកចុងកាល់ ខេត្តឧត្តរមានជ័យ ។
ក្នុងហេតុការណ៍មិនបណ្ដាលឲ្យគ្រោះថ្នាក់ដល់អាយុជីវិតមនុស្ស នោះទេ គ្រាន់តែបណ្ដាលឲ្យម្ចាស់រថយន្ដទាំងពីរនាក់ប្ដី-ប្រពន្ធ រងរបួសជាទម្ងន់ ។
ចំណែករថយន្ដត្រូវបានកម្លាំងខណ្ឌរដ្ឋបាលព្រៃឈើខេត្ត នាំយកមករក្សាទុក រង់ចាំការដោះស្រាយនៅពេលក្រោយ។
ក្នុងករណីរថយន្ដដឹកឈើប្រណីត និងទ្វារបង្អួចដោយខុសច្បាប់នេះ មិនត្រូវបាន ខណ្ឌរដ្ឋបាលព្រៃឈើ ខេត្តឧត្តរមានជ័យគ្រប់គ្រងដោយ លោក អ៊ឹម សៅរិទ្ធ បញ្ជូនសំណុំរឿងនេះ ទៅប្រព័ន្ធតុលាការដោះស្រាយតាមច្បាប់នោះទេ…! បែរលួចដោះលែងដោយស្ងាត់ៗទៅវិញ នៅព្រឹកថ្ងៃព្រហស្បតិ៍ ២កើត ខែបឋមាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៤ ខែមិថុនា ឆ្នាំ២០១៨ ធ្វើឲ្យមហាជន ក្នុងខេត្តឧត្តរមានជ័យ ដាក់ការសង្ស័យគ្រប់ៗគា្នថា ប្រហែលជាទទួលបានលាភសក្ការៈច្រើន។
មតិសាធារណជន បានលើកឡើងថា កម្លាំងរដ្ឋបាលព្រៃឈើ ខេត្តឧត្តរមានជ័យ របស់លោក អ៊ឹម សៅរិទ្ធ បង្ក្រាបបានតែគោយន្តដឹកធ្យូង នឹងគោយន្តដឹកឈើតូចតាចរបស់ពលរដ្ឋតែប៉ុណ្ណោះ មិនដែលឃើញបង្ក្រាបបានរថយន្តដឹកឈើយីឌុបធំៗរបស់ក្រុមឈ្មួញរកស៊ីដ៏ល្បីឈ្មោះ លោក ឆាយ និងលោក រិទ្ធ បានម្ដងនោះទេ ? ។
ជាក់ស្ដែងកាលពីពេលថ្មីៗនេះ កូនចៅលោក អ៊ឹម សៅរិទ្ធ គឺលោក ខន ខែម នាយផ្នែករដ្ឋបាលព្រៃឈើសំរោង ធ្វើសកម្មភាព ចុះចាប់ឃាត់ទារយកប្រាក់ពីម្ចាស់គោយន្តដឹកធ្យូងបន្តិចបន្តួច ម្តងចំនួន ៥០ម៉ឺនរៀលក្នុងមួយគោយន្ត បើមិនបានគ្រប់ចំនួននោះទេ គេនឹងចាប់រឹបអូសយកមកទុកនៅនឹងកន្លែង ពិន័យតាមច្បាប់រដ្ឋបាលព្រៃឈើ ។
ជុំវិញករណីខាងលើក្រុមការងារព័ត៌មានមិនអាចសុំការបំភឺពីលោក អ៊ឹម សាវ រឹទ្ធិ នាយខណ្ឌ័រដ្ឋបាលព្រៃឈើបានទេ៕ ប៉ែន នួន
