សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖សាលាដំបូងរាជធានីភ្នំពេញ នៅថ្ងៃទី២២ ខែមិថុនា នេះ ប្រកាសសាលក្រមផ្តន្ទាទោសបុរសជនជាតិប៊ែលហ្សិកម្នាក់ដាក់ពន្ធនាគារអស់មួយជីវិត ពាក់ព័ន្ធការជួញដូរគ្រឿងញៀនជាងមួយគីឡូក្រាម ។
ជនជាប់ចោទឈ្មោះ CATRY DAVID NOEL អាយុ៣៤ឆ្នាំ ជាប់ចោទពីបទដឹកជញ្ជូនដោយខុសច្បាប់នូវសារធាតុញៀន ប្រព្រឹត្តកាលពីថ្ងៃទី១០ ខែមករា ឆ្នាំ២០១៨ នៅចំណុចអាកាសយានដ្ឋានអន្តរជាតិភ្នំពេញ។
ជនជាប់ចោទ សារភាពថា រូបគេបានស្គាល់ជនជាតិប្រេស៊ីលម្នាក់ឈ្មោះ តាំង ហ្គី បានជិត២ឆ្នាំ។ ក្រោយមកឈ្មោះ តាំង ហ្គី បានឱ្យរូបគេទៅយកគ្រឿងញៀន ពីប្រទេសប្រេស៊ីល មកលក់នៅកម្ពុជា ដោយឱ្យតម្លៃឈ្នួល៣ម៉ឺនដុល្លារ។
ក្រោយពីជនជាប់ចោទទៅយកគ្រឿងញៀនពីប្រទេសប្រេស៊ីល ឆ្លងកាត់ទីក្រុងបាងកក មកដល់អាកាសយានដ្ឋានអន្តរជាតិភ្នំពេញ នៅថ្ងៃទី១០ ខែមករា ឆ្នាំ២០១៨ ក៏ត្រូវសមត្ថកិច្ចមន្ទីរប្រឆាំងគ្រឿងញៀនឃាត់ខ្លួនបានតែម្តង៕ ចេស្តា
