សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ ៖ សិស្សវិទ្យាល័យម្នាក់ឈ្មោះ ចាន់ រិទ្ធ អាយុ២១ឆ្នាំ រៀនថ្នាក់ទី១២A ត្រូវបានជនដៃដល់មិនស្គាល់អត្តសញ្ញាណវាយនឹងខ្សែក្រវ៉ាត់ ហើយជនដៃដល់ថាច្រឡំមនុស្ស បណ្តាលឱ្យជនរងគ្រោះរងរបួសធ្ងន់សន្លប់នៅនឹងកន្លែង ពេលដែលជនរងគ្រោះម្នាក់នេះ និងមិត្តភក្តិរបស់គេឈរលេងនៅចំណុចឡឥដ្ឋ ចុះពីផ្លូវជាតិលេខ៣ ចំងាយប្រមាណជា៣ទៅ៤ ម៉ែត្រ ស្ថិតក្នុងភូមិបឹងវែង ឃុំវាលរេញ ស្រុកព្រៃនប់ កាលពីរសៀលថ្ងៃព្រហស្បតិ៍ ៩កើត ខែបឋមាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២១ ខែមិថុនា ឆ្នាំ២០១៨ ។
ជនរងគ្រោះត្រូវបានក្រុមគ្រួសារយកទៅស្គែននៅមន្ទីរពេទ្យខេត្តកំពត ហើយត្រូវបានបញ្ជូនបន្តទៅសង្គ្រោះនៅភ្នំពេញ ដោយសាររងរបួសធ្ងន់ ។
បើតាមការសាកសួរមិត្តភក្តិជនរងគ្រោះដែលនៅជាមួយគ្នាបាននិយាយថា ពួកខ្លួនមានគ្នាតែពីរនាក់កំពុងឈរជជែកគ្នា ស្រាប់តែជនបង្កនោះមកវាយយកៗ ហើយពេលវាយឈ្មោះចាន់ រិទ្ធ ដែលជាជនរងគ្រោះបណ្តាលឱ្យសន្លប់ហើយនោះ ជនបង្កដែលមានគ្នាពីរនាក់ ស្រែកថា «អញកូនមេប៉ុស្តិ៍សាមគ្គី» ហើយក៏ជិះម៉ូតូម៉ាកសង់ ធុនសេ១២៥ ស៊េរីឆ្នាំ២០១៦ (ចំណែកស្លាកលេខមើលមិនច្បាស់ ឃើញតែលេខ ១៨៨១) ចេញបាត់ទៅ ។
ចំពោះករណីនេះនៅមិនទាន់ដឹងថា ជនបង្កនោះជាកូននាយប៉ុស្តិ៍មែនដូចដែលបានស្រែក ឬក៏ជាយុទ្ធសាស្ត្របង្វែងដានរបស់ជនបង្កឬយ៉ាងណានោះទេ តែបើតាមលោកអនុសេនីយ៍ឯក អុឹង ផល នាយប៉ុស្តិ៍រដ្ឋបាលឃុំសាមគ្គី បានបដិសេធថា គ្រួសារលោកមិនមានកូនប្រុសនោះទេ មានតែកូនស្រី ហើយកូនដែលធំជាងគេមានអាយុទើបតែ១២ឆ្នាំប៉ុណ្ណោះ តែយ៉ាងណាករណីនេះ លោក និងសមត្ថកិច្ចកំពុងស្រាវជ្រាវតាមពាក្យបណ្តឹងរបស់ជនរងគ្រោះ ដើម្បីចាត់ការតាមច្បាប់ ៕ ឆ្លាម សមុទ្រ
