សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ យុវជនម្នាក់បានរងរបួសធ្ងន់ធ្ងរដឹកបញ្ជូនទៅសង្គ្រោះនៅមន្ទីរពេទ្យភ្លាមៗ ខណៈជិះម៉ូតូបុកក្បាលរថយន្តឡិចសីុសនៅតាមបណ្តោយផ្លូវ ៦០ ម៉ែត្រ ស្ថិតក្នុងសង្កាត់ជើងឯក ខណ្ឌដង្កោ រាជធានីភ្នំពេញ នាវេលាម៉ោង ៤និង១០នាទីរសៀលថ្ងៃពុធ ១៥កើត ខែបឋមាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២៧ ខែមិថុនា ឆ្នាំ២០១៨ ។
តាមសម្តីប្រជាពលរដ្ឋបានឲ្យដឹងថាមុនពេលកើតហេតុរថយន្តឡិចសីុសRX300 ធ្វើដំណើរតាមបណ្តោយផ្លូវ៦០ម៉ែត្រ ទិសដៅពីក្បាលថ្នល់ឆ្ពោះទៅព្រែកហូរ ប៉ុន្តែខណៈមកដល់ចំណុចកើតហេតុ ក៏បានទាញចង្កូតរថយន្តបត់ឆ្វេងត្រឡប់ក្រោយដោយខ្វះការប្រុងប្រយ័ត្ន ក៏បណ្តាលឲ្យយុវជនម្នាក់កំពុងជិះម៉ូតូមួយគ្រឿងម៉ាក BENLY ពណ៌ស ពាក់ស្លាកលេខ តាកែវ 1Q-4579 បានធ្វើដំណើរស្របទិសគ្នាជាមួយរថយន្ត ក៏ជ្រុលបុកចំក្បាលរថយន្តឡិចសីុសយ៉ាងពេញទំហឹងតែម្តង ធ្វើឲ្យយុវជនជាម្ចាស់ម៉ូតូខ្ទេតចេញពីម៉ូតូបោកក្បាលរងរបួសធ្ងន់ធ្ងរ ចំណែកម៉ូតូនឹងរថយន្តត្រូវរងការខូចខាត ។
ក្រោយកើតហេតុសមត្ថកិច្ចជំនាញចរាចរខណ្ឌដង្កោបានចុះមកដល់ចំណុចកើតហេតុនឹងបានវាស់វែងរួចអូសយកម៉ូតូ និងរថយន្តទៅរក្សាទុកនៅអធិការដ្ឋាននគរបាលខណ្ឌដង្កោរង់ចាំដោះស្រាយនាពេលក្រោយ៕ ភារ៉ា ដង្កោ
