សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានធ្វើអត្តឃាតសម្លាប់ខ្លួនក្នុងបន្ទប់ជួលខ្លួនឯង ដោយសង្ស័យថា ខូចចិត្តនឹងប្រពន្ធរត់ចោលអស់រយះពេល១ខែ បង្កការភ្ញាក់ផ្អើលកាលពីវេលាម៉ោង១១និង១០នាទីព្រឹក ថ្ងៃចន្ទ ១២រោច ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៩ ខែកក្កដា ឆ្នាំ២០១៨ នៅបន្ទប់ជួលលេខ១៣ ភូមិព្រៃល្ង សង្កាត់ចោមចៅទី២ ខណ្ឌពោធិ៍សែនជ័យរាជធានីភ្នំពេញ ខណៈប្អូនប្រុសបង្កើតមកតាមរកទៅធ្វើការ ។
ជនរងគ្រោះឈ្មោះ ញឹម ទៀវ ភេទប្រុស អាយុ២៥ឆ្នាំ មុខរបកម្មករោងចក្រ ស្នាក់នៅកន្លែងកើតហេតុ មានស្រុកកំណើតនៅភូមិពងទឹក ឃុំគោកពោធិ៍ ស្រុកបូរីជល់សា ខេត្តតាកែវ ។
តាមសម្តីបងស្រីជនរងគ្រោះបានឲ្យដឹងថា មុនពេលកើតហេតុព្រឹកថ្ងៃទី៩ ខែកក្កដា ឆ្នាំ២០១៨ ជាថ្ងៃដែលជនរងគ្រោះផ្លាស់ប្តូរវេនធ្វើការពេលយប់ មិនចូលធ្វើពេលថ្ងៃវិញ តែជនរងគ្រោះមិនបានទៅធ្វើការទេ លុះវេលាម៉ោង១១ព្រឹក ទើបប្អូនប្រុសជនរងគ្រោះឆ្ងល់មិនឃើញទៅធ្វើការ ក៏មកតាមមើល ដល់បន្ទប់ជួលក៏ឃើញចាក់សោខាងក្រៅគោះទ្វារក៏មិនបើក ទើបឡើងអឺតមើលតាមប្រហោងបង្អូចទើបឃើញចង.ក ស្រែកឲ្យអ្នកជិតខាងជួយគាស់ទ្វារ តែអកុសលជនរងគ្រោះបានស្លាប់បាត់ទៅហើយ ។
សាក្សីបានបន្តថា ជនរងគ្រោះមានប្រពន្ធដោយមិនបានរៀបការត្រឹមត្រូវនោះទេ ពោលគឺស្រលាញ់គ្នាចិត្ត និងចិត្តរស់នៅជាមួយគ្នារហូតមានកូនស្រីមួយអាយុ១ខួប២ខែ ហើយកូនយកទៅយកម្តាយមើលនៅឯស្រុក ។ ជារៀងរាល់ថ្ងៃ ប្តីប្រពន្ធមួយគូនេះមិនដែលត្រូវគ្នាទេ គឺឈ្លោះគ្នារហូត ហើយភាគីខាងប្រពន្ធ ក៏បានរត់ចោលបាត់ទុកឲ្យប្តីរស់នៅបន្ទប់ជួលម្នាក់ឯងអស់រយះពេលមួយខែទៅហើយ ។
បើតាមអ្នកជិតខាងបានឲ្យដឹងថា ជនរងគ្រោះអត់ឃើញចេញពីបន្ទប់រយះពេលបីថ្ងៃមកហើយ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ចំណុចកើតហេតុ និងទំនាក់ទំនងទៅជំនាញមកកោសល្យវិច័យចុះមកពិនិត្យជាក់ស្តែង ហើយបានបញ្ជាក់ថា ជនរងគ្រោះពិតជាស្លាប់ដោយសារចង.កពិតប្រាកដមែន ។
ក្រោយមកទើបក៏ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត ៕ សុខាសែនជ័យ
