សារព័ត៌មាន នគរវត្ត តែងតែនាំមុខគេជានិច្ច
ខេត្តកំពត ៖ មានករណីគ្រោះថ្នាក់ចរាចរណ៍មួយកើតឡើង រវាងម៉ូតូ និងរ៉ឺម៉កម៉ូតូបុកគ្នា លាន់ស្នូរដូចរន្ទះ បណ្តាលឲ្យយុវជនម្នាក់បានស្លាប់ ចំណែកពីរនាក់ទៀតរងរបួសធ្ងន់ ។
ហេតុការណ៍នេះបានកើតឡើង កាលពីវេលាម៉ោង៧យប់ ថ្ងៃ អង្គារ ១៣ រោច ខែ បឋមាសាឍ ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃ ថ្ងៃទី១០ខែកក្កដាឆ្នាំ២០១៨ នៅលើកំណាត់ផ្លូវជាតិលេខ៣ស្ថិតនៅភូមិព្រៃឃ្មុំ ឃុំព្រៃឃ្មុំ ស្រុកទឹកឈូ។
នគរបាលស្រុកទឹកឈូបានឲ្យដឹងថា យុវជនដែលបាត់បង់ជីវិតឈ្មោះផាត់ លឿន អាយុ ៣០ឆ្នាំ មុខរបរ កសិករ មានទីលំនៅភូមិវត្តអង្គ ឃុំព្រៃឃ្មុំ ស្រុកទឹកឈូ ខេត្តកំពត។ចំណែកអ្នករងរបួសទាំងពីររូបដែលជិះរ៉ឺម៉កម៉ូតូមាន ១. ឈ្មោះឃុំ រដ្ឋ ភេទប្រុស អាយុ ៣៧ឆ្នាំ រស់នៅភូមិព្រៃឃ្មុំ ឃុំព្រៃឃ្មុំ ស្រុកទឹកឈូ ខេត្តកំពត, ២. ឈ្មោះម៉ា រមណីយ ភេទប្រុស អាយុ ១៨ឆ្នាំ រស់នៅភូមិអន្លង់ម៉ាក់ប្រាំង ឃុំស្ទឹងកែវ ស្រុកទឹកឈូ ខេត្តកំពត ។
ប្រភពដដែលបានឲ្យដឹងទៀតថា មុនពេលកើតហេតុ ជនរងគ្រោះដែលបាត់បងជីវិត បានជិះ ម៉ូតូមួយគ្រឿងតាមបណ្តោយផ្លូវជាតិលេខ៣ក្នុងល្បឿនលឿន ហើយពេលមកដល់ចំណុចកន្លែងកើតហេតុក៏បុកនឹងរ៉ឺម៉កម៉ូតូមួយគ្រឿងជិះគ្នាពីរនាក់កំពុងធ្វើដំណើរបញ្ច្រាសទិសគ្នា យ៉ាងពេញទំហឹង បណ្តាលឲ្យដួលរដូករណែល និងធ្វើឲ្យភាគីជិះម៉ូតូបាក់កស្លាប់នៅ កន្លែងកើតហេតុ និងរបួសធ្ងន់ភាគីរ៉ឺម៉កម៉ូតូពីរនាក់ត្រូវបានគេដឹកតាមរថយន្តសង្រ្គោះទៅកាន់មន្ទីរពេទ្យភ្លាមៗ ៕ សហការី
