សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ៖ រថយន្តឡិចស៊ីសមួយគ្រឿងក្រឡាប់ផ្ងារជើងឡើងលើ បណ្តាលឲ្យមនុស្សប្រុសស្រីនៅក្នុងរថយន្តបានរងរបួសធ្ងន់ស្រាល ។
ហេតុការណ៍គ្រោះថ្នាក់ចរាចរណ៍បង្កឡើងខ្លួនឯងនេះបានកើតឡើងនៅវេលាម៉ោង៧និង៥០នាទីព្រឹក ថ្ងៃសុក្រ ៨កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២០ ខែកក្កដា ឆ្នាំ២០១៨
តាមបណ្តោយផ្លូវជាតិលេខ៧ ចន្លោះបង្គោលគីឡូម៉ែត្រលេខ៣១២-៣១៣ នៅចំណុចផ្លូវកោងអង្គ្រង ស្ថិតនៅភូមិអន្ទង់វៀង ឃំុកន្ទួត ស្រុកចិត្របុរី ។
ប្រភពពីគរបាលមូលដ្ឋានបានឲ្យដឹងថា ជនរងគ្រោះនៅមិនទាន់ស្គាល់អត្តសញ្ញាណនៅឡើយ ដោយសារប្រញាប់ដឹកយកជនរងគ្រោះទៅសង្គ្រោះបន្ទាន់នៅឯមន្ទីរពេទ្យបង្អែកស្រុកស្នួល ។
ប្រភពបន្តថា រថយន្តមួយគ្រឿងដែលក្រឡាប់នោះម៉ាក ឡិចស៊ីស ពណ៌ស ពាក់ស្លាកលេខ ភ្នំពេញ 2AL-2244 ក្រឡាប់ជាច្រើនត្រឡប់បណ្តាលឲ្យអ្នកនៅក្នុងរថយន្តប្រុស ស្រីរងរបួសធ្ងន់ ស្រាល ។
រថយន្តបានរងការខូចខាតអស់ទាំងស្រុងផងដែរ ត្រូវបានសមត្ថកិច្ចជំនាញអូសយកទៅរក្សាទុកនៅប៉ុស្តិ៍រដ្ឋបាលឃុំកន្ទួតដើម្បីធ្វើកំណត់ហេតុរង់ចាំ ដោះស្រាយនៅពេលក្រោយ ៕ ជីវ័ន្ត
