សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ពិតជាគួរឲ្យអនិច្ចាមែនដែលនារីវ័យក្មេងម្នាក់បានបាត់បង់ជីវិតយ៉ាងអាណោចអាធ័ម ខណៈកំពុងងូតទឹកពាងក្បែរ បង្គោលភ្លើងដែកបណ្តាលឲ្យឆ្លងចរន្តអគ្គិសនី ឆក់ស្លាប់ភ្លាមៗ បង្កការភ្ញាក់ផ្អើលទាំងយប់ ។
ឧប្បត្តិហេតុនេះកើតឡើងនៅវេលាម៉ោង៩និង៣០នាទីយប់ ថ្ងៃ សៅរ៍ ៩ កើត ខែ ទុតិយាសាឍ ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃ ថ្ងៃទី២១ ខែកក្កដា ឆ្នាំ២០១៨ នៅ ចំណុចភូមិបឹង ឃុំតាំងក្រសាំង ស្រុកបាធាយ ខេត្តកំពង់ចាម។
សមត្ថកិច្ចនគរបាលស្រុកបាធាយបានឲ្យដឹងថា ជនរងគ្រោះមានឈ្មោះ រស់ ស្រេង ភេទស្រី អាយុ ២៤ឆ្នាំ ជាសិករ មានទីលំនៅភូមិ-ឃុំកើតហេតុខាងលើ ។ មុនពេលកើតហេតុ នារីរងគ្រោះបានទៅងូតទឹកពាងនៅក្បែរបង្គោលភ្លើងក្នុងរបងផ្ទះរបស់ខ្លួន ហើយពេលនោះ នារីរងគ្រោះ បានផ្អែកប៉ះនឹងបង្គោលភ្លើងដែកដែលតជាប់នឹងខ្សែភ្លើងស្រោមហើយទំនងជា ខ្សែភ្លើងនោះដាច់ខ្សែស្រោមប៉ះដែក បណ្តាលឲ្យឆ្លងចរន្តឆក់ស្លាប់តែម្តង។
ក្រោយកើតហេតុសមត្ថកិច្ចជំនាញបានចុះទៅត្រួតពិនិត្យនិងធ្វើកោសល្យវិច័យ ឃើញថា បង្គោលភ្លើងដែកនៅក្នុងរបងផ្ទះជនរងគ្រោះឆ្លងចរន្តអគ្គិសនីធ្វើឲ្យជនរងគ្រោះប៉ះឆក់ស្លាប់ប្រាកដមែន ទើបបានប្រគល់សពជនរងគ្រោះ ជូនក្រុមគ្រួសារយកទៅធ្វើបុណ្យតាមប្រពៃណី៕ សហការី
