សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់មានតួនាទីជាជំនួយការម្ចាស់ស្ថានីយ៍ប្រេងឥន្ធនៈ PTT មួយកន្លែង នៅផ្លូវជាតិលេខ១ ភូមិបឹងឈូក សង្កាត់និរោធ ខណ្ឌច្បារអំពៅ ត្រូវបានម្ចាស់ស្ថានីយ៍ឃាត់ខ្លួនប្រគល់ឲ្យសមត្ថកិច្ច កាលពីថ្ងៃទី ២៧ ខែកក្កដា ឆ្នាំ២០១៨ វេលាម៉ោង១៤និង០០នាទី ពាក់ព័ន្ធករណីរំលោភលើទំនុកចិត្ត លួចដកលុយស្ថានីយ៍ប្រេង ចាយផ្ទាល់ខ្លួន ។
ដើមបណ្តឹងឈ្មោះ ឯល លីហ្វាស់ ភេទស្រី អាយុ៣៨ឆ្នាំ ជនជាតិខ្មែរឥស្លាម មុខរបរ បុគ្គលិកស្ថានីយ៍ប្រេងឥន្ធនៈPTT ស្នាក់នៅផ្ទះលេខ៣០៩ ផ្លូវជាតិលេខ៥ ភូមិ៣ សង្កាត់ ច្រាំងចំរេះទី១ ខណ្ឌឬស្សីកែវ។
ជនសង្ស័យឈ្មោះ វ៉ែន វុទ្ធី ភេទប្រុស អាយុ ២៤ឆ្នាំ ជនជាតិខ្មែរ មុខរបរ ជំនួយការអ្នកគ្រប់ គ្រងស្ថានីយ៍ប្រេងឥន្ធនៈ PTT ស្នាក់នៅ បន្ទប់ជួល ភូមិបឹងឈូក សង្កាត់និរោធ ខណ្ឌច្បារអំពៅ។
តាមប្រភពព័ត៌មានពីម្ចាស់ស្ថានីយ៍ប្រេងបានឲ្យដឹងថា ជនសង្ស័យបានចូលធ្វើការនៅស្ថានីយ៍ប្រេងឥន្ធនៈ PTT រយៈពេល០២ឆ្នាំមកហើយ ដោយកាន់តួនាទីជាជំនួយការអ្នកគ្រប់គ្រងស្ថានីយ៍ប្រេង ហើយបានដកលុយពីស្ថានីយ៍ប្រេងសរុប ១៨.៩៨៨ដុល្លារ យកទៅស៊ីចាយផ្ទាល់ខ្លួន ។ លុះដល់ថ្ងៃទី ២៧ ខែកក្កដា ឆ្នាំ២០១៨ វេលាម៉ោង១៤និង០០នាទី អ្នកគ្រប់គ្រងស្ថានីយ៍ប្រេងឥន្ធនៈPTT បានឲ្យអ្នកត្រួតពិនិត្យចុះមកទូទាត់លើចំណូលពីថ្លៃលក់ប្រេងនិងថ្លៃឈ្នួលហាងពីរកន្លែងទៀត ជាមួយជនសង្ស័យ ស្រាប់តែឃើញបាត់លុយចំនួន ១៨.៩៨៨ដុល្លារ ។ ពេលនោះជនសង្ស័យក៏បានសារភាពថា រូបគេបានដកយកលុយយកទៅ ចាយប្រាកដមែន ។
លុះរហូតដល់ម៉ោង២២និង០០នាទីថ្ងៃដដែល តំណាងស្ថានីយ៍ប្រេង ក៏ធ្វើការឃាត់ខ្លួនជនសង្ស័យ ប្រគល់ឲ្យនគរបាលខណ្ឌច្បារអំពៅចាត់ការតាមច្បាប់ ។
បច្ចុប្បន្នជនសង្ស័យត្រូវបានឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌច្បារអំពៅដើម្បីចាត់ការទៅតាមផ្លូវច្បាប់ ៕ សណ្តោស
