សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ ៖ មានអំពើហិង្សាមួយកើត ឡើងដោយប្អូនប្រុសកាប់បងថ្លៃប្រុសរង របួសធ្ងន់ស្ទើរស្លាប់ ខណៈដែលប្អូនទៅទារម៉ាស៊ីនត្រង់សឺន័រសម្រាប់អារឈើពីបង ថ្លៃប្រុស ហើយបង្កើតជាទំនាស់គ្នាឡើង ។
ហេតុការណ៍នេះកើតឡើងកាលពីថ្ងៃអង្គារ ៤រោច ខែទុតិយាសាឍ ឆ្នាំច សំរឹទ្ធិ ស័ក ព.ស.២៥៦២ ត្រូវនឹងថ្ងៃទី៣១ ខែកក្កដា ឆ្នាំ២០១៨ នៅភូមិជ្រោះជ្រៅពោធិ៍ សាល ឃុំគ្រញូងសែនជ័យ ស្រុកស្នួល ខេត្តក្រចេះ ។
នគរបាលស្រុកស្នួលបានឲ្យដឹងថា ជន រងគ្រោះឈ្មោះ សយ ចិន្តា ភេទប្រុស អាយុ ៣៣ឆ្នាំ រស់នៅភូមិ-ឃុំកើតហេតុ បានរង របួសត្រង់ចង្កេះខាងឆ្វេងនិងប្រអប់ដៃខាងឆ្វេងបណ្ដាលឲ្យដាច់ហូរចេញឈាម។ រីឯ ជនដៃដល់ឈ្មោះ យ៉ាន់ ជា ភេទប្រុស អាយុ ២៨ឆ្នាំ រស់នៅចំណុចត្រពាំងឈូក ភូមិ ស្រែថ្មី ឃុំឃ្សឹម ស្រុកស្នួល ខេត្តក្រចេះ (បានរត់គេចខ្លួនបាត់) ។
សាក្សីបានឲ្យដឹងថា នៅមុនពេលកើត ហេតុជនដៃដល់ឈ្មោះ យ៉ាន់ ជា បានមកទារម៉ាស៊ីនត្រង់ស៊ីណ័រសម្រាប់អារឈើពី ជនរងគ្រោះឈ្មោះ សយ ចិន្តា ដែលជា បងថ្លៃរបស់ជនសង្ស័យវិញប៉ុន្តែពេលនោះជនរងគ្រោះមិនព្រមឲ្យទៅជនសង្ស័យវិញ។ បន្ទាប់មកពួកគេទាំង២នាក់បានឈ្លោះ ប្រកែកពាក្យសម្ដីគ្នាយ៉ាងខ្លាំង ហើយជនរង គ្រោះបានវាយទៅលើជនដៃដល់មួយដៃ។ ភ្លាមនោះដោយជនដៃដល់បានខឹងខ្លាំង ពេកក៏បានស្ទុះទៅទាញកាំបិតផ្គាក់ដែល ខ្លួនដាក់តាមម៉ូតូយកទៅកាប់លើជនរងគ្រោះចំនួន២កាំបិតត្រូវត្រង់ចង្កេះខាងឆ្វេងមួយកាំបិត និងត្រូវត្រង់ប្រអប់ដៃខាងឆ្វេងមួយកាំបិតបណ្ដាលឲ្យដាច់ហូរចេញឈាមយ៉ាងខ្លាំង ។
សាក្សីបានឲ្យដឹងទៀតថា បន្ទាប់មកជន រងគ្រោះបានស្រែកឲ្យគេជួយ ភ្លាមនោះក៏មានប្រជាពលរដ្ឋក្បែរនោះបានរត់មកជួយ ប៉ុន្តែជនសង្ស័យបានជិះម៉ូតូរត់គេចខ្លួន បាត់ដោយបោះកាំបិតផ្គាក់ចោលនៅលើ ចិញ្ចើមផ្លូវឆ្ងាយពីផ្ទះជនរងគ្រោះចម្ងាយ ប្រវែង៥០ម៉ែត្រ ហើយបងប្អូនសាច់ញាតិជនរងគ្រោះបានបញ្ជូនជនរងគ្រោះទៅព្យាបាលនៅមន្ទីរពេទ្យនៅឯប្រទេសវៀតណាម ខណៈដែលពេលនេះសមត្ថកិច្ចកំពុងតាមចាប់ខ្លួនជនសង្ស័យ ៕ សហការី
