សារព័ត៌មាន នគរវត្ត តែងតែនាំមុខគេជានិច្ច
សៀមរាប ៖ នគរបាលខេត្តសៀមរាបបានចុះបង្ក្រាបការលេងល្បែងស៊ីសងមួយកន្លែងស្ថិតនៅចំណុចផ្សារភ្នំក្រោមក្នុងភូមិភ្នំក្រោមសង្កាត់សៀមរាប ។
សមត្ថកិច្ចបានឃាត់ខ្លួនជនសង្ស័យចំនួន៤នាក់ជាមួយម្ចាស់ផ្ទះម្នាក់ដែលជាអ្នកបើកកន្លែងនិងជាមេល្បែងស៊ីសង និង៣នាក់ទៀតជាអ្នកចូលទៅលេង កាលពីថ្ងៃទី២៤ខែសីហាឆ្នាំ២០១៨។ ម្ចាស់ផ្ទះដែលបើកកន្លែងលេងល្បែងនោះមានឈ្មោះ អេង ចំរើន ភេទប្រុស អាយុ៣៥ឆ្នាំ រស់នៅភូមិភ្នំក្រោម សង្កាត់សៀមរាប ក្រុងសៀមរាប ខេត្តសៀមរាប ។ ចំណែក៣នាក់ទៀតដែលជាអ្នកលេងមានឈ្មោះ ស៊ីន រុន ភេទប្រុស អាយុ២៦ឆ្នាំ នៅភូមិភ្នំក្រោម សង្កាត់សៀមរាប។ទី២ ឈ្មោះ សំ ធី ភេទប្រុស អាយុ៤៨ឆ្នាំ រស់នៅភូមិ៣ សង្កាត់ចុងឃ្នៀស ក្រុងសៀមរាបនិងទី៣ឈ្មោះ លួន ណេត ភេទស្រី អាយុ៤៥ឆ្នាំ រស់នៅភូមិពោធិបន្ទាយជ័យ សង្កាត់សៀមរាប ។
ឈ្មោះអេងចំរើនដែលជាអ្នកបើកកន្លែងលេងល្បែងស៊ីសងនេះ សមត្ថកិច្ចធ្លាប់ចុះបង្ក្រាបម្តងហើយព្រមទាំងបានធ្វើកិច្ចសន្យាបញ្ឈប់បើកលេងល្បែងស៊ីសងខុសច្បាប់ផងដែរ តែជនសង្ស័យរូបនេះមិនរៀងចាលនោះទេ ។ ចំណែកជនទាំង៣នាក់ ដែលជាអ្នកលេងនោះ ក្រោយពីសារភាព ហើយធ្វើកិច្ចសន្យាបញ្ឈប់ការលេង ក៏បានឲ្យត្រឡប់ទៅផ្ទះវិញ ៕ ប៊ុនរិទ្ធី
