សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្ត្រីម្នាក់ទ្រហ៊ោយំបោកខ្លួនស្តាយស្រណោះ ខណៈមកពីធ្វើការវិញ ដល់បន្ទប់គោះទ្វារឲ្យប្តីបើកមិនលឺសម្លេងពេលពឹងឲ្យអ្នកជិតខាងជួយគាស់ ស្រាប់តែប្រទះឃើញប្តីដេកស្លាប់បាត់ទៅហើយ បង្កការភ្ញាក់ផ្អើលកាលពីវេលាម៉ោង៦និង១០នាទីព្រលប់ ថ្ងៃទី៣១ ខែសីហា ឆ្នាំ២០១៨ នៅបន្ទប់ជួលបភូមិត្រពាំងឈូក សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ ។
សពជនរងគ្រោះឈ្មោះ ទួន ណារិន (ហៅជូរ) ភេទប្រុស អាយុ៣១ឆ្នាំ មុខរបរកម្មកររោងចក្រ(វេនយប់)ស្នាក់នៅកន្លែងកើតហេតុ មានស្រុកកំណើតនៅភូមិប្រមូល ឃុំដូង ស្រុកបាទី ខេត្តតាកែវ ។ ចំណែកប្រពន្ធ ឈ្មោះ លិក ណូ អាយុ២៥ឆ្នាំ មុខរបរកម្មការិនីរោងចក្រ ស្នាក់នៅភូមិកើតហេតុខាងលើ មានស្រុកកំណើតនៅភូមិសូរជ័យ ឃុំចំការអណ្តូង ស្រុកចំការលើ ខេត្តកំពង់ចាម។
តាមប្រភពព័ត៌មានពីប្រពន្ធជនរងគ្រោះបាននិយាយថា គាត់បានចេញទៅធ្វើការតាំងពីព្រឹក រីឯប្តីសម្រាកនៅក្នុងបន្ទប់ជួលនេះ ។ លុះត្រឡប់មកពីធ្វើការវិញ គោះទ្វារក៏មិនបើក ខលទូរសព្ទក៏មិនចូល ទើបពឹងអ្នកជិតខាងជួយទម្លុះទ្វារចូល ស្រាប់តែឃើញប្តីដេកស្លាប់ទៅហើយ ។
ក្រោយពេលកើតហេតុ ក្រុមគ្រួសារបានប្តឹងសមត្ថកិច្ច ចុះមកពិនិត្យ និងកោសល្យវិច័យដោយសន្និដ្ឋានថា ពិតជាស្លាប់ ដោយសារគាំងបេះដូងពិតប្រាកដមែនហើយបានប្រគល់សពទៅក្រុមគ្រួសារយកទៅធ្វើបុណ្យតាមប្រពៃណី ៕ សុខាសែនជ័យ
