ប្រទះឃើញបុរសម្នាក់ស្លាប់ក្នុងទឹកស្រះដោយខ្លួនជាប់នឹងមង

ភ្នំពេញ៖ ប្រជាពលរដ្ឋបានប្រទះឃើញសពបុរសម្នាក់ អណ្តែតក្នុងស្រះ ដោយមងបានវ័ណ្ឌខ្លួនជាប់ ហើយត្រូវបានគេសង្ស័យថា ដោយសារតែជាប់មងនោះហើយ ទើបបណ្ដាលឲ្យគាត់ឈ្លក់ទឹក និងលង់ស្លាប់បែបនេះ ។

ហេតុការណ៍នោះបានកើតឡើង បង្កការភ្ញាក់ផ្អើល កាលពីវេលាម៉ោង ៧ព្រឹក ថ្ងៃទី២ ខែកញ្ញា ឆ្នាំ២០១៨ នៅចំណុចស្រះទឹក មុខបូជនីយស្ថានទួលធាតុ ស្ថិតនៅក្នុងភូមិព្រៃកុដ សង្កាត់កំបូល ខណ្ឌពោធិ៍សែនជ័យ ។

អ្នកភូមិនិយាយថា បុរសដែលស្លាប់ខាងលើ មិនទាន់ត្រូវបានស្គាល់អត្តសញ្ញាណនៅឡើយ និងមានវ័យជាង ៣០ឆ្នាំ សប្បុរសណ្តែកបាយ ស្លៀកខោកីឡា ជើងខ្លី ពណ៌ក្រហម ពាក់អាវយឺត ដៃខ្លី ពណ៌ប្រផេះ ។ កន្លងមក គេតែងបានតែឃើញបុរសនេះ ដាក់មងយកត្រីនៅក្នុងស្រះទឹកខាងលើរាល់ថ្ងៃ និងជាយូរមកហើយ ប៉ុន្តែគាត់បានសុខសប្បាយរហូត ដោយឡែក កាលពីល្ងាច ថ្ងៃទី ១ ខែកញ្ញា ឆ្នាំ២០១៨ ក៏ឃើញមកដាក់មងដែរ ។ លុះព្រឹកឡើង ម៉ោង ប្រហែល៨ព្រឹក ថ្ងៃទី ២ ខែកញ្ញា ឆ្នាំ២០១៨ ខណៈដែលពួកគាត់ដើរឆ្លងកាត់ទីនោះ ស្រាប់តែឃើញសពអណ្តែត ផ្កាប់មុខក្នុងស្រះទឹក ដោយខ្លួនជាប់ជាមួយមងបាត់ទៅហើយ ទើបរាយការណ៍ប្រាប់សមត្ថកិច្ចឲ្យចុះទៅពិនិត្យ និងធ្វើកោសល្យវិច័យតែម្ដង ៕ សុខាសែនជ័យ