សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ជិះម៉ូតូមួយគ្រឿង គេចពីម៉ូតូរ៉ឺម៉កកង់បី ឆ្លងផ្លូវជ្រុលចង្កូតទៅបុករយន្ត តូយូតាព្រូស បើកបរបញ្ច្រាសទិសដៅគ្នា យ៉ាងពេញទំហឹង បណ្តោយឲ្យរងរបួសធ្ងន់ កាលពីម៉ោង១និង៣០នាទីរសៀល ថ្ងៃទី១ ខែតុលា ឆ្នាំ២០១៨ នៅត្រង់ចំណុចមុខដីឡូត៍គ្មានលេខមួយកន្លែង តាមបណ្តោយផ្លូវទន្លេសាប ភូមិ៣ សង្កាត់-ខណ្ឌជ្រោយចង្វា។
រថយន្តរងគ្រោះម៉ាក តូយូតាព្រូស ពណ៌ស ពាក់ស្លាកលេខ ភ្នំពេញ 2AA-9157 រងការខូចខាតកំពិតកាងមុខនឹងបែកកញ្ចក់ផ្ទាំងមុខទាំស្រុង ។ ចំណែកឯម៉ូតូបង្កម៉ាកស៊ុយសាគីស្មាស់ ពណ៌ខ្មៅ ពាក់ស្លាកលេខ ភ្នំពេញ 1CU-4082 រងការខូចខាតមួយកំណាត់មុខទាំងស្រុង និងអ្នកបើកបររងរបួសធ្ងន់ដៃខាងស្តាំ។
ប្រភព័ត៌មាននៅកន្លែងកើតហេតុបានឲ្យដឹងថា ឃើញម៉ូតូបង្កជិះ ដោយបុរសម្នាក់តាមបណ្តោយផ្លូវទន្លេសាប ក្នុងទិសដៅពីត្បូងទៅជើងក្នុងល្បឿនគួរសំ រីឯរថយន្តរងគ្រោះបើកបរបញ្ច្រាសទិសដៅគ្នា ពេលម៉ូតូបង្កចំណុចកើតហេតុ ក៏ស្រាប់តែមានម៉ូតូរ៉ឺម៉កកង់បីបើកបរពីមុខរថយន្តស្របទិសដៅបានបទឆ្វេងឆ្លងបានពាក់កណ្តាលផ្លូវ ធ្វើឲ្យម៉ូតូបង្កអកស៊ើ គេចមកខាងឆ្វេងដៃជ្រុលទៅបុកពីមុខរថយន្តយ៉ាងពេញទំហឹងផ្លោងអ្នកជិះម៉ូតូបោកទៅផ្ទាំងកញ្ចក់ខាងមុខរងរបួសធ្ងន់។
ក្រោយកើតហេតុ ម្ចាស់រថយន្ត និងម៉ូតូសម្របសម្រួលគ្នានៅកន្លែងកើតហេតុ ដោយម្ចាស់ម៉ូតូបង្កចេញសងថ្លៃជួលជុលរថយន្តចំនួន១៥០ដុល្លារ ដើម្បីបញ្ចប់រឿងនៅកន្លែងកើតហេតុ៕ ជ្រោយពេជ្រ
