យុវជន២នាក់ បើកម៉ូតូឌុបគ្នាប៉ះជាមួយរថយន្តធុនធំ បណ្តាលឲ្យស្លាប់ម្នាក់ និងម្នាក់ទៀតរងរបួសធ្ងន់

ភ្នំពេញ៖ យុវជន២នាក់ បើកម៉ូតូឌុបគ្នាយ៉ាងលឿងជ្រុលចង្កូតទៅប៉ះជាមួយរថយន្តធុនធំមួយគ្រឿង បណ្តាលឲ្យយុវជនម្នាក់ បោកក្បាលស្លាប់នៅនឹងកន្លែង និងម្នាក់ទៀតរងរបួសធ្ងន់ ។

ហេតុការណ៍នេះបានកើតឡើង កាលពីម៉ោងជាង១រំលងអធ្រាត្រ ឈានចូលថ្ងៃទី១៨ ខែវិច្ឆិកា ឆ្នាំ២០១៨ ស្ថិតនៅតាមបណ្តោយផ្លូវព្រះស៊ីសុវត្ថិ សង្កាត់វត្តភ្នំ ខណ្ឌដូនពេញ រាជធានីភ្នំពេញ ។

ជនរងគ្រោះដែលស្លាប់មានឈ្មោះ ពន្លឺ អាយុ២៤ឆ្នាំ មុខរបរជាងដែក ទីលំនៅ ក្រុងតាខ្មៅ ខេត្តកណ្ដាល និងអ្នករងរបួសធ្ងន់មិនទាន់ស្គាល់អត្តសញ្ញាណ ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេយុវជន២នាក់ បើកម៉ូតូមួយគ្រឿងម៉ាក Suzuki Nex ពណ៌ប្រផេះ ពាក់ស្លាកលេខ កណ្ដាល 1Y-7744 ក្នុងទិសដៅពីត្បួងទៅជើងក្នុងល្បឿនយ៉ាងលឿន
បានជ្រុលទៅបុករថយន្តដឹកអីវ៉ាន់មួយគ្រឿង ម៉ាក Hyundai ពណ៌ស ពាក់ស្លាកលេខ ភ្នំពេញ 3A-1367 ក្នុងទិសដៅបញ្ច្រាសគ្នាពេញទំហឹង បណ្តាលឲ្យយុវជនម្នាក់បោកក្បាលស្លាប់ភ្លាមៗនៅកន្លែងកើតហេតុ និងម្នាក់ទៀតរងរបួសធ្ងន់ ។
ចំណែកម្ចាស់រថយន្តបានរត់គេចខ្លួនពីកន្លែងកើត
ហេតុបាត់ ។

បន្ទាប់ពីកើតហេតុសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញមកវាស់វែងរួចយករថយន្ត និងម៉ូតូទៅរក្សាទុកនៅការិល័យចរាចរផ្លូវគោករង់ចាំដោះស្រាយគ្នានៅពេលក្រោយ ។ ចំណែកសពជនរងគ្រោះត្រូវបានប្រគល់ឲ្យក្រុមគ្រួសារដឹកយកទៅស្រុកកំណើតធ្វើបុណ្យតាមប្រពៃណី ៕ ជ្រោយពេជ្រ