ឆបោកយកម៉ូតូពីមិត្តភក្តិបានជាង១ខែ ជនរងគ្រោះប្រើនារីម្នាក់ធ្វើជាធ្នាក់ណាត់ជួប ចាប់បានវាយជនសង្ស័យប៉ោងភ្នែក

ចែករំលែក៖

ភ្នំពេញ ៖ កាលពីវេលាម៉ោង៤ល្ងាច ថ្ងៃអាទិត្យ ១០រោច ខែកត្តិកឆ្នាំច សំរឹទ្ធស័ក ព.ស២៥៦២ ត្រូវនឹង ថ្ងៃទី២ ខែធ្នូ ឆ្នាំ២០១៨កម្លាំងនគរបាល ខណ្ឌពោធិ៍សែនជ័យ បានទទួលជនសង្ស័យម្នាក់ ពីជនរងគ្រោះក្រោយធ្វើសកម្មភាព ឆបោកយកម៉ូតូ ពីមិត្តភក្ តិបានសម្រេច ហើយគេចខ្លួនបាត់ជាង១ខែ ក៏ត្រូវម្ចាស់ម៉ូតូ ប្រើល្បិចឲ្យនារីម្នាក់ ធ្វើជាធ្នាក់ ណាត់ជួបជនសង្ស័យ ហើយនាំគ្នាបានវាយម្នាក់ មួយដៃមួយជើង ប៉ោងភ្នែក រួចប្តឹង សមត្ថកិច្ចប៉ុស្តិ៍ចោមចៅ៣ ខណ្ឌពោធិ៍សែនជ័យ ។

មន្រ្តីនគរបាលខណ្ឌពោធិ៍សែនជ័យ បានឲ្យដឹងថា ជនសង្ស័យឈ្មោះ សួន ឃីម ភេទប្រុស អាយុ១៨ឆ្នាំ មុខរបរបើករថយន្តស្នាក់នៅម្តុំផ្លូវ ប្រឡោក បែក មានស្រុកកំណើតនៅភូមិតាំងគោកឃុំ ផ្សែងភ្លើង ស្រុកបារាយណ៍ខេត្តកំពង់ធំ ឆបោកម៉ូតូមួយគ្រឿង ម៉ាកស៊ុយហ្ស៊ីយគីនិច ពណ៌ត្រួយចេក ស៊េរីឆ្នាំ២០១៤ ពាក់ស្លាកលេខ ភ្នំពេញ 1 DH-3326 ។ ចំណែកជនរងគ្រោះឈ្មោះប្រាក់ សុវ័ន ភេទប្រុស អាយុ១៧ឆ្នាំ មុខរបរជាងសាឡុង ស្នាក់នៅភូមិថ្មគោល៣ សង្កាត់ចោមចៅ១ ខណ្ឌពោធិ៍សែនជ័យ មានស្រុកកំណើតនៅភូមិផ្លូវទូក ឃុំប្រលាយមាស ស្រុកកំពង់លែង ខេត្តកំពង់ឆ្នាំង ។

មន្រ្តីដដែលបន្តថា នៅមុនពេលឃាត់ខ្លួនជនសង្ស័យខាងលើនេះគឺជនសង្ស័យ និងជនរងគ្រោះជាមិត្តភក្តិនឹងគ្នា ហើយទើបនឹងស្គាល់គ្នាបានពីរបីថ្ងៃតែប៉ុណ្ណោះ ដោយពួកគេបាននាំគ្នាជិះម៉ូតូចេញពីបន្ទប់ជួលជនរងគ្រោះនៅម្តុំត្រពាំងថ្លឹង សង្កាត់ចោមចៅទី១ ទៅដើរលេងនៅម្តុំកំបូល តាមបណ្ដោយផ្លូវជាតិលេខ៤ លុះជិះម៉ូតូមកដល់ស្តុបទំនុបកប់ស្រូវ នៅពេលនោះជនរងគ្រោះនឹង ជនសង្ស័យត្រូវសមត្ថកិច្ចដាក់គោលដៅត្រួតពិនិត្យច្បាប់ចរាចរណ៍ ពេលនោះពួកគេម៉ូតូគ្មានដាក់កញ្ចក់ និងមិនពាក់មួកសុវត្ថិភាព ក៏ត្រូវកម្លាំងនគរបាលឃាត់និងផាកពិន័យ ។ ប៉ុន្តែដោយសារតែពួកគេគ្មានលុយថ្លៃផាកពិន័យ ជនសង្ស័យក៏បានឲ្យជនរងគ្រោះចាំនៅកន្លែងសមត្ថកិច្ច ហើយរូបគេជិះម៉ូតូរបស់ជនរងគ្រោះទៅយកលុយពីមេរបស់ខ្លួននៅម្តុំកំបូល ដើម្បីយកលុយឲ្យសមត្ថកិច្ច ។

ប្រភពបានបន្តទៀតថា ខណៈពេលជនរងគ្រោះជាម្ចាស់ម៉ូតូចាំជនសង្ស័យអស់រយៈពេលជាង១ម៉ោង ពុំឃើញជនសង្ស័យយកម៉ូតូនិងលុយឲ្យសមត្ថកិច្ច ហើយមានការសង្ស័យថា ជនសង្ស័យខាងលើនេះ បានប្រើល្បិចឆបោកម៉ូតូគាត់យកទៅបាត់ហើយទើបជនរងគ្រោះបានប្រាប់ សមត្ថកិច្ចចរាចរណ៍តាមដំណើររឿងនិងទៅប្តឹងនគរបាលប៉ុស្តិ៍ចោមចៅទី១ភ្លាមៗផងដែរ ។ លុះដល់ថ្ងៃទី២ ខែធ្នូ ឆ្នាំ២០១៨ ជនរងគ្រោះទើបស្គាល់លេខទូរស័ព្ទរបស់ជនសង្ស័យ ក៏បានឲ្យនារីម្នាក់ជាមិត្តភក្តិ ធ្វើជាធ្នាក់ដើម្បីទូរស័ព្ទណាត់ជួបជាមួយជនសង្ស័យ និងហៅមិត្តភិត្តមួយចំនួន រង់ចាំស្ទាក់ចាប់បានជនសង្ស័យ ហើយនាំគ្នាវាយម្នាក់មួយដៃមួយជើងបណ្តាលឱ្យប៉ោងមុខ រួចប្រគល់ឲ្យសមត្ថកិច្ចចាត់ការតាមនីតិវិធី ។

ក្រោយពេលកើតហេតុ ជនសង្ស័យ បានឆ្លើយសារភាពថា ម៉ូតូដែលឆបោកពីជនរងគ្រោះនោះ គឺយកទៅបញ្ចាំបាត់ហើយបច្ចុប្បន្នជនសង្ស័យត្រូវបានសមត្ថកិច្ច កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់ ៕សតារា